Aizawl: Chief Minister Lal Thanhawla chuan Zirtawpni chawhnu dar 3 khan Government T. Romana College Campus thar tur Republic Vengthlang-a College hmun hma tur sawrkarin a pek lawmna programme leh Campus thar-a building sakna tur lungphum phumna programme a hmanpui. Chief Minister chuan phal taka Republic Vengthlang Local Council, khawtlang hruaitute leh veng mipuiin hmathlir thui tak leh ngaihtuahna zau tak neia Government T. Romana College campus atan ram an pe chu fakawm a tih thu a sawi a. “Sawrkarin zirna ziktluak leh tha quality education te a phak tawk angin a ngaituah a, zirna tih hmasawnna atan Education Reforms Commission a din a, mahse duh anga sum hman tur sawrkarin a neih loh avangin a rawtna te chu tihhlawhtlin a harsa a, chuti chung chuan kan phak tawk leh kan theih ang angin tumna nen an rawtna te tihhlawhtlin kan tum a ni,” a ti. CM chuan mi mal thenkhat ten zirna in leh Sawrkar ram te dik lo takin khawngaihthlak khawpin an nek chep thu sawiin Government J Thankima College tana sawrkarin Brigade rama hmun a pek pawh mimal thenkhatin harsatna an siam mek thu a sawi  bawk. Government T Romana College Campus thar hi RUSA atanga sum hmuh atangin college building, a dung feet 59.5 leh a vang feet 41.4 sak tum a ni a, ruahman dan chuan he building hi chhawng li a sak tum niin a bultan nan chhawng hnih a sak tum phawt a ni. College sak nan hian Project lian zawk NEC lamah pawh buaipui mek a ni.