December 13, 2022; Mizoram sawrkar, MNF ministry a Minister of States (Excise, Social Welfare leh AH & Vety, Sericulture) Dr. K. Beichhua chuan vawiin khan Chief minister Zoramthangan banna thehlut tura a tih angin, minister atanga banna a thehlut a, thuthar thehdarhtute zawhna chhangin, a hmalam hun tur sawi theih a nei rih lo niin a sawi.

CM hnen banna a thehluh zawha thuthar thehdarhtute zawhna chhangin, Dr. K Beichhua chuan nimin tlai dar 4 dawn khan Chief minister hnen atangin lehkha a dawng tih a sawi a, chutah chuan, CM in cabinet member te hna chanpual siam danglam a duh thu leh chumi vang chuan minister of state a nihna ang a banna a ranglam a thehlut tura tih a ni tih a sawi. 

Mara Autonomous District Council (MADC) buaina vang a nih leh nih loh thuthar thehdarhtute zawhna chhangin, Dr. K. Beichhua chuan, banna thehlut tura tih a nih nachhan sawi mai theih a neilo nia sawiin, "Hotute thupek kenkawh kawngah hian rinawm leh thuawih lutuk hi a tawrh ve theih a nih dawn hi tih ngaihdan erawh ka nei," a ti.

MNF party ah a la awm thu leh hnawhchuah a nih loh thu te sawi bawkin, rinawm taka MNF a awm mek a nih thu te a sawi a, "Ka hmalam tur erawh chu sawi theih ka nei rih lo a, ka bial mipuite, min thlang tute thu leh hla ni turah ka ngai," a ti.

Dr. K. Beichhua chuan, a chung a thil thleng chungchangah Pathian hnenah lawmthu a sawi a, ama tan leh Zoram tana thatna tur zawkah a pawm thu leh chu chu a tawngtaina a nih thu a sawi. "Zoram mipuite hnenah rinawmna, huaisenna leh taimakna nen pheikhai rual taka he ram hi lungrual takin i enkawl ang u tih hi ka chah duh a ni," a ti bawk.

Siaha bialtu MLA Dr. K. Beichhua hi MADC leh Siaha district a MNF hruaitu mi engemawzatin an tawiawm a, chung zingah chuan District president hlui C. Lawbei, District Council Chairman N. Viakhu, N. Lalrosanga, Vice Chairman, Planning & Development Board, district MNF GS te an tel.

Dr. K Beichhua hi Siaha bialah tun hi term hnih MNF ticket a thlan tlin ni tawhin, Congress sawrkar liam ta hun a MNF in MLA an neih tlemte zinga mi niin, MNF chhiat lai zawng zawng a Assembly house leh party thil tihna a MNF awinungtu pawimawh berte zing a tel a ni.