Aizawl: Chief Minister Lal Thanhawla chuan nimin zing khan NEDP hnuaia cheng nuai 700 senga sak tur Zarkawt Community Hall sakna tur lung a phum. Chief Minister chuan, “Ram hmasawnna ruhrel, khawtlang in an mamawh leh an tangkaipui tur tam zawk neih hian ram a thang a, changkanna kan pan zel tih a lantir a, infrastructure development chu ram hmasawnna tehfung langsar tak a ni,” a ti a. Tun hnaiah Aizawl khawchhung leh Mizoram hmun hrangah hall tha tak tak hawn a nih thu a sawi bawk. Bialtu MLA Lal Thanzara, PWD Minister pawhin Zarkawt khawtlang mamawh tak Hall tha tak din a ni tur chu lawmawm a tih thu leh ruahman ang taka a sak hna thawh a beisei thu a sawi. Hall sakna lungphum phum inkhawmah hian Er. R. Lalrintluanga, Chief Engineer, PWD chuan building sak dan tur report a pe a. Hall hi PWD chuan architectural leh structural design siamin, Suvidha Infrastructure, Upper Khatla ten an sa dawn a, thla 36 chhunga sak zawh fel tura ruahman a ni. Hall hi chhawng ruka sak tur niin, floor zawng zawng zau zawng belhkhawm chu 1282.69 sq.metre a ni dawn a. Basement III-ah Chowkidar quarter leh generator dahna siam tur a ni ang a, Basement II chu mi 120 lenna Multipurpose Hall a ruahman niin, Basement I chu lithei dahna leh tui zem hunna atan hman tur a ni a, Ground Floor-ah lirthei dahna leh Store room siam niin, First Floor chu mi 214 lenna Hall-a siam tum a ni a, a chung ber Second Floor-ah Badminton Court pahnih siam ruahman a ni.