ZALEN, July 01, 2025: Chief Minister an hmuh hmasak tuma a lo tiam tawh bawhzuiin Thawhlehni khan Mizoram Volleyball Association (MVA) hruaitute chuan Lalduhoma chu a pisaah an hmu nawn leh a, Mizoram Volleyball Indoor Stadium atan sum mamawh dan ruahman chhinna, propose estimate an thehlut.

April 16 khan MVA hruaitute hian chief minister hi a pisaah an lo hmu tawh a, hemi tum hian Aizawlah volleyball khelhna tur indoor stadium hran an neih loh avanga harsatna an tawhte leh hma sawnna daltu a nih thu an hrilh a, ngaihtuahsak a lo tiam.

Chief minister hian indoor stadium sak chu a ngaih pawimawh thu hrilhin a sak nana sum ngai turte ruahmanna siama sorkara thehlut turin a rawn a. Hemi hnuah a sakna tur sum (fund) awm theih dan ngaihtuahpuia sak a nih ngei theih nan tanlakpui a tum thu a lo hrilh a ni.

Hemi bawhzuiin hian MVA hruaitute hian propose estimate an siam chu an thehlut a, chief minister hian a department chan, planning department atanga buaipui a tum thu leh sorkarin Aizawla volleyball indoor stadium a awm loh avanga a ngaih pawimawh zual bik (priority list)-a an dah tur thu a lo hrilh.

Lalduhoma chuan a theih ang anga hma pawh lak vat a tum thu lo hrilhin MVA hruaitute pawh Chief Minister chungah hian an lawm hle a ni.

Tun laia Mizorama infiamna lar, entu pawh ngah leh a khel pawh pung chak tak, volleyball hi Aizawlah a khelhna hmun bik indoor stadium a la awm loh avangin a khel mite chuan hmun hrang hranga infiamna dang nen intawmah an khel thin.

MVA pawh hian inelna a buatsaihin a remchanna hmun hrang hrang an hmang mai thin a. A tlangpuiin R. Dengthuama Hall, Mualpui; LPS Arena, Falkland, Jt. YMA Hall, Vaivakawn leh Thutak Nunpuitu Team khelmual te an hmang thin.

MVA hruaitute hian tun hnaia LPS Arena-a khualrel chhiatna tawkte tana tanpuina atana Charity Volleyball Match & Show a buatsaiha an an sum hmuh zinga mi, Rs. 50,000 chu Chief Minister’s Relief Fund-ah an chhunglut nghal bawk.

MVA-in June 20 zana Charity Volleyball Match & Show an huaihawtah hian Rs. nuai 5 an hmu chhuak a, an sem chhuak vek tawh.

Hruaitute hi hmun hrang hrangah insem darhin Serchhip, Hnahthial, Lawngtlai, Champhai leh Aizawl district hmun hrang hranga chhiatna tuarte tanpuina sum an hlan a. Khuarel chhiatna avanga thi chhungte hnenah ralna Rs. 10,000 theuh an pe bawk.

CHARITY VOLLEYBALL MATCH & SHOW-A SUM HMUH SEMNA:

1. Champhai - Rs. 30,000 (Mitthi pathum Rs. 10,000 theuha ral an ni)

2. Serchhip - Rs. 1,00,000

3. Lawngtlai - Rs. 1,00,000

4. Falkland, Aizawl - Rs. 30,000 (Mitthi pathum Rs. 10,000 theuha ral an ni)

5. Tachhip Rs. 10,000 (Mitthi pakhat ral a ni)

6. Vaivakawn, Aizawl - Rs. 40,000

7. Venghlui, Aizawl - Rs. 40,000

8. Mission Veng, Aizawl - Rs. 20,000

9. Mission Vengthlang, Aizawl - Rs. 20,000

10. CM Relief Fund - Rs. 50,000

12. Hnahthial - Rs. 50,000

13. Serchhip - Rs. 10,000 (Mitthi pakhat ral a ni)