Aizawl August 2, 2024 : Nimin khan Chief Minister Laduhoma chuan New Delhi-ah Union Home Minister Amit Shah a hmu a, Manipur CM-in zin tura a sawm thu a hrilh a, Assam Rifles chungchang-a hmalak dan turte an sawi dun bawk.

Chief Minister hian, tun hnaia Central sawrkarin raltlan (displaced persons) te tana Mizoram sawrkar Rs. 10 crore a rawn pek avangin lawmthu a sawi. Manipur harsatna tawh thuah Home Ministry leh Manipur tlangmi mipuite aiawh ITLF hruaitute chuan inbiakna nei thei se thaa a hriat thu a hrilh a. Lalduhoma hian Manipur Chief Minister Biren Singh-an Imphala zin tura a sawm thu pawh Amit Shah hi hrilhin tihhlawhtlinsak a duh thu pawh a hrilh.

Assam Rifle sawn chhuah chungchang pawh an sawidun a. Assam Rifle lamin an MoU tur an peih har avanga hmalakna a khawtlai tak thu sawi lan a ni. Home Minister hian, Ministry atangin officer lian pahnih a rawn tir ang a, anni hovin Aizawl-ah AR lam te nen lo sawidun leh ang, tiin hmalak zel dan tur a ruahmanna a lo hrilh a. A tahtawla an chhuah phei a tul tur thu pawh a sawi a ni.

Chief Minister hian Assam Rifle leh Mizoram sawrkar ngaihdan inhmu rem lo lai te a awm anih chuan inpawh taka sawiho an inpeih thu a hrilh ve bawk. Amit Shah hian Cyclone Remal tuartute endika rawn kal special team te report chu Finance lamah a la awm rih thu a hrilh a, a rang lamin an lo ngaihven ang a, chhawmdawlna sum pawh engemawzat an rawn pe ang, tiin Chief Minister hi a lo hrilh bawk.