ZALEN October 17, 2024 : Congress Thalai chuan thuchhuah siamin ZPM sawrkar chuan RTI Act an rapbet a. SPIO ten uluk taka RTI chhanna an buatsaih pawh Chief Minister leh Minister ten an lambun! Sawrkarin a ruat SPIO hnathawh chu ZPM party in an duhdan zawnga her rem tumin an kalpui a, hei hi mipui dikna zahlohna leh palzutna a ni, an ti.

Tualchhung chhanchinbu pakhatin a tarlan danin RTI hmanga zawhna September ni 25-a chhan tawh tur zawhna Chief Minister-in a kawl mek a, RTI chhanna department in a lam theih tih an sawi pawh a lam tura kal ten Minister-in a endik leh dawn si avanga lam leh theih loh bakah RTI chhanna Minister thenkhatin tunah an kawl mek avangin a hun takah RTI chhanna hi a zawttu te'n an dawng thei lo mek bawk, tih he chanchinbu hian a tarlang a ni, an ti.

Congress Thalai chuan hei hi ZPM sawrkarin thil dik lo an tih thupnaah an ngai a, hetiang mipui dikna chanvo rahbehna hi chhui turin hma an lak tum tih an tarlang.

MPYCC chuan RTI hmanga CM relief Fund hmanna zawhnaah MLA leh ZPM unit-te an lang teuh a. Hei hi Chief Minister facebook page-a CM relief Fund dawngtu list an post leh RTI chhanna a in ang lo an ti a, ZPM hian kawng tinrengah mipui an bum mek a ni.

"Chief Minister Lalduhoma hian RTI chhanna chu a rintlak lo tiin a lo sawi tawh a, hei hi a chhangtu mithiam bik SPIO te hmuhsitna leh leh diriamna a tling tawh. SPIO ten chhanna dik lo an pek chuan hrem mai tur niawm tak a nih laiin engvangin nge SPIO te chhanna a zawttu hnena pek hmaa Minister-in an ennawn leh fo tih hi Congress thalai zawhna a ni a, ni 30 chhunga RTI zawhna chhan hman loh a tam phah hle a ni," an ti.