ZALEN August 9, 2023 : Vawiin khan Congress Thalai MPYCC ten Chief Minister hnenah tuna Parliament Session neih mek a, No Confidence Motion (No Trust Motion) putluh mek thlawp tura ngenna lehkha pek an tum a, Police ten Chief Minister Office Gate-a luh an phal loh avangin hun engemawchen an innawr buai. 

Chief Minister Office Gate bulah hian MPYCC President Laltawnliana chuan thu sawiin, "Parliament Session-ah No Confidence Motion (No Trust Motion) chu move mek a ni. MNF unau ten hun an neih lai hian, kan MP zahawm tak hian BJP lamah vote lo turin kan ngen. An Hindu-pui ngeite pawhin Kristian-te min nghaisakna hi a luttuk e, an tih tawh laia, Kristian MP ten Kristian-te min nuai chimih vek duhtu BJP party-te an la kawp reng hi kan ngaithiam thei lo a ni," a ti. MPYCC President chuan he BJP rin lohna motion hi kan MP zahawm tak hian thlawp ngei turin kan ngen bawk a ni, a ti bawk. 

MPYCC President chuan Chief Minister Office-ah hian buaina siam tum an nih loh thu sawiin, "Chief Minister hi lehkha pe tur mai an ni a ti a, Chief Minister hian official-in BJP sorkar a thlawp dawn lo tih thuchhuah min tihchhuahsak turin kan phut a, tawngka ringawt chu kan awi tawh lo. Facebook-a I&PR Minister Pu Lalruatkima'n BJP an thlawp loh thur thu a post mai mai ang hi chu kan pawm tawh lo va. CAB chungchangah kan hre tawh, a do zawngin ka vote ang titu kan MP zahawm tak khan, Mizo mipui-te min nuihzat chungin CAB thlawp zawngin a vote leh si a, Mizo mipui-te min tizak lutuk, hetianga Mizo mipui-te min phatsanna ang hi thleng tawh lo se kan duh a ni," a ti bawk.

MPYCC te hi Magistrate leh Police duty ten Chief Minister office gate chhunga luh an phal loh avangin hun engemaw chen MPYCC leh police-te hi an in nawr buai a, hemi hnu hian Magistrate duty-te ruahmanna angin, Chief Minister office gate pawnah, MPYCC-te duh dan angin lehkha hi Chief Minister Private Secretary Lalhmansanga hnenah an thlenlut ta a ni.