Aizawl: Mizoram political party lian 4 - Congress, BJP, ZNP leh BJP zingah MPCC President Lal Thanhawla a hausa ber a, Lalduhoma a rethei ber thung.   Affidavit an thehluh atanga a lan danin Chief Minister ni mek, Lal Thanhawla (80) hian sum fai kawl Rs. 5,00,000 neiin bank hrang hrang - SBI Aizawl, SBI Zarkawt, SBI Zoram Platinum, Axis, HDFC, MUCO, MCAB, Canara Aizawl, Canara New Delhi, Vijaya Bank-a a sum neih bakah lirthei Maruti gypsy leh rangkachak 2.20 gram a nei a, a thil neih hlut zawng hi Rs. 1,28,06, 007.90 a ni a. Leiba Rs. 49,73,066 a nei nia tarlan a ni. Hawla hian agricultural Neihbawi, Lengpui, Sairang leh Then zawlah a nei a, non agricultural land hi Vairengte, Maumual leh Newtown, Kolkata-ah a nei a. A chenna atana a hman mek, Zarkawtah in a nei bawk. Hawla nupui hian sum leh rohlu dang Rs. 92,13,740.47 a nei niin affidavit-ah hian tarlan a ni.   MNF President Zoramthanga (74) hian sum fai Rs. 10,00,000 neiin Axis bank, SBI Aizawl, SBI New Delhi, UBI leh HDFC-ah account neiin motor pahnih, Vitara leh Gypsy a nei bawk a, a thil neih hlut zawng hi Rs. 57,22,552.00 niin leiba a nei lo thung. MNF President Zoramthanga hian hmun 3-ah agricultural land a nei a, chungte chu Sihphirah 2 leh Saihapui-ah te a ni a. Hei bakah hian Chaltlang vengah LSC 2 a nei a, tuna an chenna, Ramhlun Venglai chu a nupui in nia tarlan niin nupui thil neih hlut zawng hi Rs. 43,756.33 a ni.   ZNP President leh Zoram Peoples Movement in Chief Ministerial candidate atana an hual Lalduhoma (69) hian sum fai Rs. 70,000 neiin SBI, MCAB-ah te account a nei a, lirthei pahnih Maruti leh Jeep neiin a thil neih hlut zawng hi Rs. 18,34,861 niin tarlan a ni a. Sihhmuiah agricultural land neiin Chawlhhmunah LSC a nei bawk. Lalduhoma hian State Bank of India-ah loan ba (MLA Loan) Rs. 5,04,535 a nei bawk. BJP President Prof. JV Hluna hian tangka fai kawl lai nei lovin SBI, MCAB, MCAB Mission veng, SBI Mission vengah te account neiin Santro car a nei bawk a, a thil neih hlut zawng hi Rs. 20,05,147 nia tarlan a ni a. Hei bakah hian agricultural land hmun 4 - Bungthuam, Chemphai, Bukvannei leh Tuichhuahen-ah te a nei a. LSC hi Zemabawk, Luangmual, Upper Khatla leh Sikulpuikawnah te a nei bawk.