Aizawl February 23, 2023: PC Party President Vanlalruata President chuan Chief Minister Office (CMO) inrelbawlna hautak lutuk chu vei awm a ti a, minister 11 dang te inenkawlna aiin a hautak zawk niin a sawi.

Vawiin February 23, 2023 (Ningani)-a PC Party OB meeting thutkhawmna kaihruaitu Vanlalruata chuan, ''Minister dang 11 enkawlna aiin Chief Minister enkawlna hi a hautak zawk. Council of Ministers Budget hi a pumpuiin Budget tharah hian cheng nuai 713.18 a ni a; Hemi atan hian 2021-22 khan cheng nuai 603.91 hman a ni. Kum kal lai 2022-23 budget-ah hian cheng nuai 702.34 ruahman anih laiin cheng nuai 754.04 hman tur anga pawisa dil belh a ni a; Kum hmasa aia cheng nuai 150.13 laia tam hman a ni tur anga lang hian rilruah zawhna a siam. Kum kallaia sum hman aia tlem budget thara ruahman a ni leh lawi hian hmasawn tumna felfai awm loh zia a tarlang," a ti.

Ruata chuan, ''He council of Minister budget-a 55.14%, cheng nuai 393.25 hi Minister 11 enkawlna tur a ni. A bâk 44.85%, cheng nuai 319.93 hi Chief Minister enkawlna tur a ni thung a. Hetianga CM enkawlna hautak em em chhan hi CMO (Chief Minister's Office) tia kan sawi thin, Chief Minister's Secretariat hranpa kan neih vang a ni. Hemi enkawlnan hian 2021-22 khan cheng nuai 255.94 hman a ni a. Kum kallai 2022-23 hian a tirah cheng nuai 250.23 hman tura chhut niin cheng nuai 273.23 hman leh zawk tura ruahman nawn a ni. Budget tharah hian cheng nuai 274.39 hman tura ruahman a ni. (Heta senso leh senso tura ruahman tarlanah hian venhimna lam senso leh a bungalow enkawlna senso a la tel lo a ni). Chuvangin CMO hranpa nei lo ta ila thil dang tulah  kan hlawkpui viau dawn a ni," a ti bawk.