ZALEN January 19, 2026: Mizo Hnam Run chhung inkhawm chu vawiin khan neih a ni a. He hunah hian MNF Gen. Hqrs PAC member R. Lalzirliana, Ex. Minister chuan thusawiin, "ZPM mite tan chauhva Chief Minister special package hi hman tur anih dawn chuan, Lalduhoma special package, tiin thlak mai rawh se. Hetianga an thutiam an bawhchhiatna langsar taka an tlangaupui ta mai hi, Pathian leh mipui pawikhawihna a ni a. Val Upa Council an tih te inrawlhna awm tak anih laiin, an ngawi thap lawi si a ni," a ti.

Zira chuan, "Kohhran hruaitu leh hotu engemaw zat awmna ZPM party hi a nghet lo hle, an sawrkar hnua inthlan apianga an chaklo zel hian hei hi a ti chiang a ni. Israel faten ringlo mite nen puanzar an inzawm hnua Pathian pawi an khawih ang khan, an thutiam an bawhchhiatna hi Pathian pawi an khawihna a ni a. Anmahni thusawi hi anmahni vekin an hnial leh thin."

"Policy & program chik peih leh zirpeih an tam tial tial a. Chuvangin, thu belhchian dawllo leh dawtthu sawi hi miten an chhinchhiah a, a hun leh hmun nen an vawngtha khiau thin. Thu chauha ZPM ten an sawi, kalphung thar, an tih hi a takah hmuh tur a awm lova, an danglamna hriat tur a awm hek lo. CM, Minister leh an MLA ten sawrkar hmasa leh midangte demna leh sawiselna tellovin thu an sawi hleithei lo a ni," a ti.

P&E Minister hlui chuan ZPM ten hma an lak ve na lian tham deuh chu MNF sawrkar hunlaia bul lo tan tawh, engkim lo ruahmansa vek tawh a ni zel tiin, "Thenzawl solar plant, Sumsuih solar plant leh Tuirini khuah tura hmalak mekte pawh MNF ruahmansa leh thui tak a lo kalpui tawhsa a ni. Tuirial hydel project chungchanga sawrkar hmasa leh engineer te an demna pawh thil an hriatfuh tawkloh vang leh siamthat theih anih hunlaia hma an lakloh vang a ni," a ti.