ZALEN October 30, 2025: Dampa (S/T) Assembly Constituency by-election-a MNF official candidate Dr. R. Lalthangliana chuan October ni 29 khan Pukzing Vengthar, Hruiduk, Marpara, Marpara North leh Bekabekia-te tlawhin, vawiin October ni 30 hian Hruiduk, Pukzing Vengthar, Hnahva leh Silsuri a tlawh a. Heng hmunah te hian CM Special Package leh Hand holding policy te inngahna tlak a nih loh thu a sawi.

Dr. Thangtea chuan ZPM-in Dampa bial by-election a an auhla leh mipui an vehthlemna ber Chief Minister Special Package cheng nuai khat pek tih leh hand holding policy chu mipui tan inghahna tlak a nih lohzia a sawi a. "Kum hnih dawn ZPM Sorkar-ah hian Dampa bial Silsuri-ah pakhat chauh la pek a ni. Hemi atan hian sum pek tur Sawrkarin an nei lo a, inghahna tlak a ni lo," a ti.

"Hand Holding Scheme-a Loan an aupui pawh hi mirethei zawkte dawmkanna tur ni lovin, rulh leh ngei ngei ngai, pawisa pung tam tak nena leiba insiamna mai mai a ni thei" a ti a. "Mihring sing chuangin he loan hi an dil tawh laiin Bank chuan mi 200 vel chauh loan an la pe thei a, ZPM Sawrkarin a thlanchhuah mi 700 chuang atangin mi 100 chuang zet chu bank hrang hrangin an lo hnawl tawh bawk; Sawrkarin a nawrna avangin Bank Institution tlem zawkin loan hi an pe hram hram a, loan tha mi anga an zawrh mek hi inbumna mai a ni," Dr. Thangtea chuan a ti.

MNF Sr. Vice President chuan, "Sawrkar lai mekin kuthnathawktute a enkawl dan leh an hlawhchham chhoh mek dan kan hmu tawh a. Dampa biala Hmunphiah chingtute tah leh rumna kan hria a, Sawhthing chingtute sum tur cheng Vbc 5 vel tihchingpen thu te kan hre zui leh a, an la bat sak ṭeuh bawk. Chuvangin ZPM Sawrkar ah kuthnathawktute tan beisei tur thar a awm lo a ni," a ti.