ZALEN November 5, 2025: MPCC President Lal Thanzara chuan Dampa bial bye-election lo awm tur atan W Phaileng ah Congress worker ten infuihtharna hun an buatsaih a hmanpui a, a thu sawinaah Lal Thanzara chuan tuna Chief Minister hi Kohhran upa a ni a, thu belhchian dawl lo a sawi fo mai hi a tha lo a, kohhran hotute pawhin sawipui ngam se a that a rin thu a sawi.

Lal Thanzara chuan, "Kan Sport Minister in hman ni khan 'pulpita dinpui ngam politic kan khel tur a ni' a ti a, thu tha tak a ni. A awmna party leh Chief Minister te awmdan hi a ngaihtuah lo em ni tih ka ngaihtuah a. Pulpita dinpui tlak politic kan khel dawn anih chuan inthlan hmaa BJP sum an hman te kha an inchhir thu sawi se ka ti hle mai."

"Mizoram hian Chief Minister tha tak tak Pu Ch. Chhunga, Pu Thena te, Pu Lal Thanhawla te, Pu Laldenga, Pu Zoramthanga te kan nei tawh a. An ni khan thu dik lo an sawi an sawi kan hre lo. Tuna kan Chief Minister hi Kohhran upa a ni a, thubelhchian dawllo a sawi fo mai hi a tha lo a, kohhran hotute pawhin sawipui ngam se a tha in ka ring," a ti.

"Kan Chief Minister hian hman ni lawk khan Silisuri-ah Mizoram a sawrkarna lo chelh tawh, kan hotu hmasa ten Chakma huat mipui an zirtir ang khan a sawi a. Chakma vote a duhna lamah khatianga a sawi kha a tih tur a ni lova, Chief Minister sawi awm pawh a ni lo. Chief Minister chu Mizo mipuite tan pa nih tling a ni tur a ni a, khatianga Chakma te fuihpawrh zawnga thu a sawi kha thil pawi tak a ni. Khatiang khan tunhma a Chief Minister ten an sawi ngai lo," a ti bawk. 

MPCC President chuan MNF party chungchang sawiin, "Phuldungseiah kan thlen In nu chuan Pu Thangtea kan In-a a rawn len-in a haw turin min rawn bekbawr a, kan hotupa hi kan duh tawh lova, kei hi a lehpeka Chief Minister tur ka ni a ti, tiin a sawi a. Hei hian an party hi an buai hle tih a lantirin ka hria. Tunah hian an President ber pawh helamah rawn kal lovin Lunglei lamah a kal daih a ni. A ni hi tling se MNF hi an buai phah hle in ka ring," a ti.