Chief Minister Zoramthanga chu Mizoram mamawh hrang hrang buaipuiin New Delhi ah hun engemaw chen a thang a, CM hian mi pawimawh hrang hrang hmuin Mizoram mamawh a thlen a, a zinna hian rah tha a chhuah ngei beisei ang.

Tun tum Chief Minister Delhi zin hi central lamah Ministry thar a din avangin inhmelhriat nan leh Mizoram mamawh hrihhriatna hmasa atan a zin niin a ngaih theih a. Minister leh mi pawimawh hrang hrang a kawmna ah Mizoram mamawh thlenin heng a thil thlen te hi Union Minister leh official lian a hmuh te hian project te thehlut a, a tul anga lo bawhzui zel a tum thu an lo hrilh hlawm a. Chuvangin tun tumah hian Chief Minister hi project bawhzui ni lovin project awm tur lo inhmakhuana atan central mi pawimawhte a lo hmu lawk a, nakina project thehluh tur a lo hmakhua tihna a ni.

Engpawh nise Chief Minister hian project bawhzui a nei lemlo anih pawhin thiantha leh hmelhriat siam zawnga a zin hi a tha hrim hrim a. Nakinah project te siamin bawhzui ngai a awm hunah pawh kawng a lo sial lawkin 'tha ba' a siam ni ah ngai ila, a hlawkna kan la tel ngei turah beisei ang. Chutih rual erawh chuan a bawhzui kawngah tha thlah lova beih nawn fo erawh a ngai thin a ni.

Zep nak emaw Mizoram chu state pachhia, thawhchhuah nei lo kan ni a. Chuvangin sawrkar laipui atanga sum kan hmuh hi innghahna leh hmasawnna hnathawh nan kan hmang lo thei lo a ni. Hei vang tak hian project siam lama taimak a, central sum a tam thei ang ber haichhuah hi kan tum a ngai a ni. Hetah tak hian sawrkar hnathawk te an pawimawh a, project siam lamah tun aia taimak lehzual an chhuah a pawimawh.

Central ah hian sum a tam a, mahse haichhuak tur chuan project tha nen chauh haichhuah theih a ni. Central hi tunhma aiin a fir tawh a, sum inpek mai mai ang kha a theih tawh loh a ni. Project tha leh utilisation fel fai tak nena hmalak anih chuan CM zinna hian rah tha a chhuah ngei ang.