Aizawl; Chief minister Zoramthanga chuan 'Economic Molecule' chu kan ram economy tih hmasawnna a tana thil tangkai leh mamawh, kan ramin a neihsa te leh hmasawnna ruhrel (infrastructure) sawina a nih thu a sawi.

Assembly budget session neih mekah C. Lalsawivunga zawhna ziaka chhangin, Planning & Programme Implementation dept. changtu chief minster Zoramthanga chuan, sawrkar, khawtlang leh mimal tin ten kan tih tur chanpual theuh thawhhona tha tak hnuaia theihtawp kan chhuahin, he Economic Molecule te hi ram hmasawnnan activate a nih tur thu a sawi.

Zoramthanga chuan Economic Molecule pawimawh tak chu Mau a ni tih sawi bawkin, "Lian tham zawka kan ram a Mau kan hman tangkai theihnana kan mawh chu link road," a ni a ti. Link road neih a nih theih nan sawrkarin theihtawpin concept paper te buatsaihin hma alak thu leh a vawikhat nan bombaoo link road project sawrkar laipuiin scheme thar PM-DevINE hnuaia Rs. vbc. 100 chu Union budget 2022-23 ah a rawn approve niin a sawi.

Hmasawnna ruhrel ah pawh Aizawl by-pass road Rs. vbc. 500 man he scheme ah bawk hian rawn approve a nih thu leh hei hian nasa takin kan ram economy thanna tura a sul sutu a nih beisei a nih thu a sawi bawk.