ZALEN February 13, 2026 : Co-operation Minister PC Vanlalruata chuan vawiin khan Zawlnuam-ah North East-a Sangha tin siamna hmasaber chu Khuallian niin a hawng a, Bialtu MLA Robert Romawia chuan Khualzahawm niin a telpui bawk.

Zawlnuam Fishery Cooperation Society Ltd. hnuaia Sangha tin siamna khawl hi kum 2024 July khan Cooperative Department chuan Sawrkar laipui hnenah thlen sakin, Integrated Cooperative Development Project kaltlangin Cheng nuai 65 hmuh a ni a, khawl lei nan Cheng nuai 40 lakhs hman niin, a in sak nan nuai 25 hman a ni. Sangha tin hi vawikhatah kg 50 siam theih niin chu chu a tin chuan tin 120 a niin hemi siam chhuak tur hian darkar 2 chhung hun hman a ngai a ni.

Khuallian chuan, "Mizoram tana mellung thar, rotling tak mai hawn an ni ta chu a buatsaihtu Society leh Department-te thawhrimna leh hmalakna a fakawm hle a ni. Sangha tin siamna kan kawtkaia hawn a ni ta chu sangha tharchhuah kan hralh lehna kawngah nasa takin kuthnathawktute a pui dawn a, sangha manin a lian chiah hralh a nuamin, a man pawh a pangaiin a hralh theih thin a, tunah chuan a te deuh zawk pawh Sangha tinah siam theih a ni dawn ta hi a tha hle a, chutihrual chuan ei leh in siamtu kan nih avangin fimkhur tak leh mipuite'n an duh tur ngeia siamchhuak tura kan inbuatsaih a tul dawn a ni," a ti.

PC Vanlalruata chuan Industry hlawhtlinna ber chu min dawrtu mipuite mit a tlung em, an duhzawng an siamchhuak em tih ngaihtuahna chang hria a piangin hmasawnna hmel an hmuh thin avangin chutiang ang taka inbuatsaih tur chuan Zawlnuam Fishery Cooperation Society- te a chah a, Sangha tin siamna hmunhma leh hmalak leh zelna turah sawrkarin theihtawpchhuah a in huam thu leh inpawh tlang taka thawkho zel turin a sawm bawk.