ZALEN, Nov. 17, 2024: Mizo tlangvalten Pathianni khan Col CK Nayadu Trophy khelh mekah Arunachal Pradesh chu thawh (innings) khat leh run 81-a sawpin hnehna an chang leh ta a, final erawh an thleng zo ta lo thung.

Mizoram hi Plate Group-ah awmin an group-a awmte an inkhelh kual chhuah hnuah a sang pahnihin final khelh tur a ni a, Mizoram hian khelh ngaah vawi hnih hnehna changin 4-naah an awm a. An group-a la khel zo ve lote result azirin an dinhmun erawh danglam thei a ni.

Gujarat College Cricket Ground A, Ahmedabad, Gujarat-a Zirtawpni atanga Mizoram leh Arunachal Pradesh inkhelah hian Mizo tlangvalten vawi khat thawha run 354 an siam chu lehlamah hian vawi hnih an thawhah pawh umphak lovin inkhelh tur ni khat hmang bângin an sawp a ni.

Arunachal Pradesh hian an an vuak hmasakah run 164 chauh an tlin thei a, Mizoram tan Lalthlanawma (Omoma) chuan over 15.3 a vawmah run 31 chauh pein mi panga zet a vawm hlum a, an tumpuite run vuak chhuah tam tur vengtu ber a ni.

Mizoram hian vaw vein Sahil Reza chuan century siamin run 109 a thawh chhuah leh vice captain K.Vanrotlinga’n run 92 a vuak chhuah chu an dinhmun thatna bul a ni a, run 354 an tlin theih chhan a ni a. Prem Kumar Layak-a’n run 42 leh Naveen Ayyush Gurung-a’n run 32 an thawh bawk.

Innings khatnaa wicket nga latu, Omom-a chuan Arunachal Pradesh vuak thawh hnihnaah pawh mi pathum lai a vawm hlum leh a, Sahil Sharma-a’n pali vawm hlumin Naveen-a’n pahnih a vawm hlum bawk.

Mizoram bowler-te chet that avang hian run 109 chauh an tlin theih phah a, vawi hnih an vuakah hian Mizoramin vawi khatah run 354 an siam chu 81 zetin an la phak ta chuang lo a ni.

Col CK Nayadu Trophy hi Board of Control for Cricket in India (BCCI)-in kum tin state/association-te tan mipa kum 23 hnuai lam inelna atana a buatsaih thin a ni a. Mizoram hian kuminah hian Arunachal Pradesh hma hian Sikkim pawh a lo hneh tawh a ni.

SCORE:

Arunchal Pradesh - 164 (58.3 Ov) & 109 (53.5 Ov)

Mizoram - 354 (98.4 Ov)

Mizoram won by innings & 81 runs

(Thlalak hi a remchang dah a ni)