ZALEN, Nov. 9, 2024: India rama mipa kum 23 hnuai lamte inelna sang, Col CK Nayudu Trophy khelh mekah Mizoram chuan Sikkim chu an khelmualah wicket ruka hnehin semifinal luh chhe tê an neih theih phah.

Ni khat aia rei khelh chi (multi days format) tournament-ah hian Mizoram hi Plate Group-a team ruk zingah 5-na an ni mek a, a sang paliin semifinal an lut thei dawn.

An chung chiahah Sikkim awmin point 4-in an phak lo mek a, khelh khat ve ve an la neiha an chet dan azirin a thiam pali zinga tel tur a hriat dawn a, Mizo tlangvalte dinhmun erawh a tha lo zawk.

Hetih lai hian inkhel hnuhnung berah Sikkim hian an group-a sang ber, vawi li khelha chak loh la nei lo, Pondicherry (BCCI hnuaiah hetiang hian an la inziak) tlawhin Mizoram hian an hnuaia awm, chak la nei lo, Arunachal Pradesh an tlawh ve dawn thung a. An hmachhawn tur ve ve enin Mizoram hian beiseina a la nei sang viau thei.

Inkhel hnuhnung ber, Zirtawpni atanga SICA Ground, Ranpo, Sikkim-a khelh tanah hian Sikkim hian vaw hmasain thawh (innings) khatnaah run 180 siamin an thi zo va, Prem Kumar Layak, Ainawn Vengin Mizoram tan mi pali a vawm hlum.

Mizoram vuak thawh hmasaah run an vaw chhuak tam hret a. Sahil Sharma, Thuampui chuan ball 121 a vuakah run 74 vaw chhuakin a zarah run 183 an tlin thei.

Sikkim vuak thawh hnihah Mizoram bowler-te an che tha tlang a, run 104 chauh an tlin thei a. K Vanrotlinga, Ramhlun Venglai chuan thawh hlawk berin wicket thum a la, mi pahnih vawm hlum pathum an awm bawk.

Sikkim hian vawi hnih vuakah Mizoram tan chakna turin run 102 an tuk a. Opener pahnih, Albert Ramthanpuia, Ramhlun Venglai (run 41) leh Vanlalpekhlua, Zemabawk (run 19) ten bul an tan that zarah mi pali chauh thi hmanin Over 26.2-ah Mizoram hian an umpha a, wicket rukin hnehna an chang. 

Mizo tlangvalte hian ni li chhunga khelh zawh tura ruahmanah ni thum leh chawhma chhung awrhin hmarchhak thenawm tlangvalte hi an khelmualah ngei an hneh a. Cricket Association of Mizoram (CAM) chuan a tlawhtu zawkin hnehna an changah player leh supporting staff-te huaisena leh thawhrimna a chhuanawm a, under–23 team a chhuangin a lawmpui tak zet tih an sawi. 

Col CK Nayadu Trophy hi Board of Control for Cricket in India (BCCI)-in India rama state/association under-23 inelna atana kum tin a buatsaih thin a ni a. Mizoramin Arunachal Pradesh a hmachhawn leh tur hi November 15-a khelh tan tur niin Ahmedabad, Gujarat-ah an khel ang.

SCORE:

Sikkim - 180 (53.2 Ov) & 104 (39.5 Ov)

Mizoram - 183 (74.1 Ov) & 104/4 (26.2 Ov)

Mizoram won by 6 wickets