Aizawl October 3, 2022 : ZPM Leader Lalduhoma chuan, President, Leader, Working President an nei chu an party in an hlawkpuiin an thatpui niin a sawi. Mi Party inrelbawlnaah an inrawlh lo a, an party inrelbawlnaah party dang an rawn a tul lo, a ti. Working President K. Sapdanga chuan, Thluaka sum lut natna nei tawh chuan, vote nen lam, engkim hi lei leh hralh theih vekah an ngai tawh niin a sawi bawk.

Vawiin khan Keifang Venghlun Branch YMA Zawlbuk-ah ZPM Tawi East Block buatsaihin political training neih a ni a. He hun hi ZPM Leader Lalduhoma leh ZPM Working President K. Sapdanga bakah General Headquarters hruaitu engemawzatin an hmanpui a ni.

He huna thusawitu ZPM Leader, Lalduhoma chuan, “Kum 2023-ah sawrkarna siam tumin theihtawp kan chhuah a, hmabak kan la ngah, rim leh zual a thawk turin kan inngen a ni. ZPM-in collective leadership kan nei hi kan hlawkpui a, President, Leader, Working President kan nei hi a hlawkin kan party tan a tha em em a ni. Mi Party inrelbawlnaah kan inrawlh lo a, kan party inrelbawlnaah party dang kan rawn a tul hek lo. ZPM culture chu Zo nun ze mawi, Kristianna nen a inrem a ni. Thlemna hneh theih hi a ropui a, a aia la ropui zawk chu thlem ngamloh nih hi a ni. Thlem ngama awm chu kan lo dûp tawh thin tihna a ni. Rinawm hi a tlo ber a, keimahni avangin miten lo tel an chakin an hreh thei. A ram leh a felna zawng hmasa zel turin, midang tana malsawmna ni turin i thawk ang u. Engkim min pek tiamtu chu kan Pathian a ni,”a ti.

ZPM Working President  K Sapdanga pawhin thu sawiin, "Thluaka sum lût natna kan vei tawh chuan leilung leh a chhunga thil awm zawng zawng hi lei leh hralh theih vekah min ngai a ni ta ber a. Kan vote hi lei/hralh theih anga zuamawma kan lantir tawh chuan party policy leh manifesto-in awmzia a nei lo va, candidate tha neih a sawt hek lo. Sum nei lo tana in-candidate ngam lohna, candidate tura sum neih hmasak tula hriatna, fit vang ni lova hausak vang ngawta tling tura inngaihna a awm ang. Hei hian politics hi mihausa, rilru dik lo te game-ah a chantir thei. Politics kan tih hi mi hausa thenkhat chuan gambling angah an ngai. Party-ah an buai ve lo, tling tura an rinah sum an thàp ang a, an tlin tir chuan contract leh supply hna an hmu let leh mai dawn a ni. Heng tireh theitu hi voters kan ni. Sum sem avanga chak tum te hi sum sem vanga chak loh tir theitu chu mipui hi kan ni. Kan vote tluka chak a awm lo,” a ti.

Sapa chuan, “Tunhma chuan party chhunga mite chauhin politics an khel a. Tunah chuan party pawna miten politics an ngaihven ta.  Party chhunga mite chuan an fak tur leh an ep tur a chiang a. Tan lam nei lo rilru an hre thiam thei lo va, An party boruak bak an pawm thei lo. Tu sawrkar pawh ni se, mipui an mangan hunah pawh mangan nachang an hre thei lo. Party pawna mite chuan tan lam nei lovin thil an thlir a, tun hi mangan hun a ni tih an hrethiam. Kan hmabak inthlanah hian politics ngaihven / khel nasa ber tur te chu sawrkar hnathawkte hi an ni dawn. An tan chuan politics hi politics a ni tawh lo. An chaw bel a ni. Tu nge an hlawh batsak lo ber ang tih hi an ngaihven lehzual tawh ang. Hlauh an nei tlem tial tial a, an rilru an sawi chhuak ngam tial tial,”a ti bawk.