November 10, 2022; Govt. Aizawl North College chuan an College hmunhma chungchanga sawrkar hmalakna duhkhawp lohna lantirna leh sawrkar nawrna atan vawiin chawhnu dar 1:30 vel atang khan Bawngkawn - Chanmari kawng, Ramhlun North a an College kawtah kawngpui an dang a, darkar 3 tling lo deuh an dan hnuah kawngpui dan an titawp lailawk. Sawrkar atanga thu lawmawm an hmulo a nih chuan naktuk atangin na zawka sawrkar nawr an tum.

Govt. Aizawl North College SU hruaitute chuan tukin dar 10 atang khan sawrkar nawrna atan an college kawtah sit-in-protest an nei a, sawrkar atanga thu lawmawm dawn an neih loh avangin chawhnu dar 1:30 vel atangin college zirlai zawng zawngten kawngpui an dang a, sawrkar lam aiawhte leh SU hruaituten inbiakna an neih hnu-ah kawngpui dan an titawp lailawk.

SU hruaitute sawi danin, Falkland veng a RAY building thlang ram awl an dil chu GAD ah file a thang mek a. Hei hi a hlawhtling angem tih erawh hriat a ni lo. 

Govt. Aizawl North College hian Trade & Commerce building, Ramhlun North bazar chu kum 2015 atang khan luahhawhin, bazar building an luah theih hun chhung chu December, 2022 ah a tawp dawn a, hemi vang hian zirlai 1,560 te chu class kalna turah an buai hle dawn a ni.

SU hruaitute chuan College building leh ram chungchangah Higher & Technical Education minister te, UD&PA minister te bakah Chief minister pawh an lo hmu tawh tih an sawi a, sawrkar thuneitu hrang hrangte pawh an lo hmu nual tawh niin an sawi.

SU hruaitute sawi danin, Bethlehem Sahuan hmun hlui te, CWC mual Zemabawk te, DIET ram thenkhatte leh LAD office duilding te pawh sawrkarin a pek theih mai tur thute sawi hmuh an lo ni tawh a. Chung zawng zawng chu a hlawhchham vek hnuah CM an hmu nawn leh a, RAY building thlang, UD&PA ram ruak a kawhhmuh nawn leh a, hemi chungchangah pawh hma an lak viau hnuah CM appoinment takngial pawh an hmuh theih tak loh avangin, Govt. Aizawl North College zirlaite chuan ram chungchanga an hmalakna chu a hlawhchhamah an ngai a, lungawi lohna lantir mai an ngai ta niin an sawi.