Aizawl: College zirlai zinga 50. 6%-in darkar 4 chuang ni tin social media an hmang a, 77%-in an men rei phah niin tualchhung chanchinbu Vanglaini in a zirchiannaah tarlan a ni a. Nimin khan he chanchinbu huaihawt hian Aijal Club-ah mi thiam bikte sawmin Zoram Titi buatsaih niin ‘Social Media leh Mizote’ tih thupui thlansa chu sawiho a ni.

College 5 atangin sample 500- Govt. Aizawl College, Govt Aizawl West College, Govt. Zirtiri Residential Science College, Govt. Hrangbana College leh Pachhunga University College zirlai 100 theuh-ah social media zawhna chhan tir an ni.

Chhangtute dinhmun chu hetiang hi a ni. Mipa 59%, hmeichhia 41%. kum 17-19 inkar 59 %, kum 20-22 38%, kum 23 chin chung lam 38% an ni.

Social hmangtu zingah whattsapp 97.2%, FB 79.2%, Instagram 82.4%, Twitter 11.8%,, Pinterest 9.6%, Snapchat 26.6%, Youtube 92.2%, Tumblr 2.6 te an ni.

Ni khata social media hman dan chu darkar 5 aia tam 29.4%, darkar 4 - 21.2%, darkar 3- 25.4, darkar 2 -15.2%, darkar 1 - 5.4%, darkar 1 aia tlem 3.4% a ni bawk a ni (Ni khata darkar 4 leh a aia tam khawih percentage belhkhawm hi 50.6% an tling). Social media platform 1-a account 1 aia tam nei zat chu 36% niin 77%-in zing thawh hlim atangin social media an khawih nghal a. Zan men rei phah 75% an nih laiin social media chu tunlai thilthleng hriat awlsam nan 99%-in an hmang bawk a, chanchinthar hriat nan 90%-in an hmang bawk a ni.

Social media-a fakna vangin 76% in thil zawrh te chu an lei phah lo tiin an chhang a, hetih rual hian social media chauh chu thil zawrh/fakna atan tawk kan ti tia chhang chu 79% lai an ni thung.

Milar zui (follow) thin 17% an awm a, milar thil post erawhin an thu tlukna erawh a nghawng niin 26% chuan an chhang a, 74% chuan nghawng lo tiin an chhang bawk.

Sawm bik 30 kalkhawmte hi police, psychiatrist, pyschologist, infiammi, kohhran, media, zirtirtu, dan hremi leh mi challang te an ni tlangpui.

Police lam chuan thiamna sang zawk nena thuam an nih tawh avangin social media hmanga pawikhawihna chu an chhui chhuak ve zel tawh thu an sawi a, pyschiatry lam pawhin social media a bikin on-line gaming vanga nunphung buai pantu an ngah thu an sawi bawk a ni.