Aizawl; Govt. J.Thankima College zirlaite chuan an college atanga Environmental Studies zirtirtu Hnahthial College a sawn chu an remti lo tih sawiin a tul ang zela dodal an tum tih an sawi. Nimin khan Aizawl Press Club ah thuthar theh darhtute kawmin Govt. J.Thankima College Students Union hruaitute chuan an college ah pawh zirtirtu an indaihloh em em laia EVS zirtirtu Rebecca Khiangte sawn a ni chu an hrethiamlo hle tih an sawi a. Rebecca Khiangte chu 2nd test an neih zawh taka peper enlai engemaw zat la nei anih avang te, end semester exam lo awm tura probable question siam tura an ngen leh siam lai mek ani chunga sawrkarin sawn a tum chu zirlaite hmakhaw ngaihlohna lian tak nia an hriat thu an sawi a. Sawrkarin an ngenna te a tih hlawhtlin sak theihloh chuan lung awilohna lantir kawngzawh leh a tul dan a zira total bandh hial neih an tum tih an sawi bawk.