ZALEN Oct. 8, 2024; Lirtheia eizawng pawl hrang hrangten oil man tihhniam an phutna a hlawhtlin tak loh avangin, October ni 14, 2024 atangin tiamchin awm loin an ding dawn.

An thuchhuak kimchang

(Press Release)

Dt.7th October 2024-a Mizoram Commercial Vehicle Union (MCVU) General Headquarter Executive Meeting chuan a hnuaia mi ang hian thutlukna kan siam a ni:

1. Oil man sang tihniam tur hian MCVU chuan Chief Minister hi Ni 16th September 2024 ah leh Ni 24th September 2024 te khan hmuh a ni a, ani bakah hian Ni 17th September 2024 khan Taxation Minister hmu bawkin hmalak a ni a, Resource Mobilization Committee-ah sawiho turin leh Cabinet-a sawi ho turin min ti a, Chief Minister-in 'Cabinet in kan ngaihtuah a, a ngaiin kal se kan ti', tia a sawi tak avangin kan hlawh chham ta a ni. Oil man a lo san veleh khan Commercial Vehicle zawng zawng Motor eizawn nan a hmang te, eizawnna a nghawng nghal tih kan hria a, Sawrkar ah rate up dil ve nghal mai a tha lawm ni kan ti a, amaherawh chu sumdawng motor zawng zawng rate a san chuan, nitin mamawh ei leh bar zawng zawng a nghawng nghal dawn avangin mipui te harsatna siam tlem zawngin motor fare hrang hrang tisang lova Oil man tihniam tura ngen zawk kan ni a, kan ngenna a hlawhtling ta lo erawh pawi kan ti a, oil man a hniam ngei theih nan a tawp thlengin kan tang dawn a ni. Oil man tihhniam a nih hma chu Dt. 14/10/2024 zing dar 6:00 am atangin tiam chin awm lova din a ni dawn a, District tinah duty in dah vek a ni bawk ang.

2. Oil man sang hian nasa takin lirtheia ei zawngte bakah, Zoram pumah mipuiin kan tuar mek a ni, Thlai hnah zuar thlengin kan tuar ta a ni ber a. Tunah hian North East State ah oil man hi kan sang lawr lak a ni.

Sawrkar in projected additional revenue Rs. 92.84 Crores lai mai hmuh an tum avanga, Zoram mipui te min sawrfu hi kan hrethiam thei lova, kei ni Mizoram mamawh Buhfai leh chakkhai phur te pawhin chawi belh chuan kan tlan thei tawh lova kan din mai a ngai ta hi mipuite hriatthiamna kan ngen a ni.

3. Kan hriat theuh angin Zoram pumah kawng a chhe em em vek a. Kan motor te kawng laiah a tlu ngut zela, kan motor parts chi hrang hrang a in elh tliak in a chhe nasa a, kawng chhiat avanga kan motor in a tawrh mek laiin, oil man a lo sang bawk hi keini lirthei a ei zawngtute tan chuan "kawng chhe bawk, oil man sang bawk avang hian oil man tal a hniam loh chuan lost in kan tlan thei ta lo a ni" tih kan in hriattir a ni.

4. Oil man sang leh Kawng chhe lutuk avanga Lirthei a eizawng ten harsatna kan tawh mek hi sawrkarin kan dilna min tihhlawhtlinsak theih loh avangin Mizoram chhunga Lirthei Number Plate eng zawng zawng chu tlan lova ding vek turin kan in ngen a ni, MCVU member ni lo te pawh kan tan vek a ni tih hria a, MCVU hmalakna hi thlawp theuh tura ngen an ni a, thuawih lo kawhmawh bawl an awm a, harsatna an chungah a thleng a nih pawh in MCVU in mawh a phur lovang.

An thuchhuahah hian lirtheia eizawng pawl hrang hrang aiawh ten hming an ziak.