Thawhtanni atanga Suva-a khelh tan tur, Commonwealth Weightlifting Championships-ah Lalruatfela chu India aiawhin a feh chhuak mek a, junior leh senior huanga rit chawi tur Mizo tlangval hian medal a lak ngei pawh beisei a ni.

Fiji khawpuia Britain-in a awp tawh ramte ritchawia an inelna turah hian Commonwealth Youth Weightlifting Championship 2023-a gold medal lo la tawh, Ruatfela hian mipa kg 89 huanga India ai a awh dawn a, a che sual hle a nih loh chuan medal a lak ngei an beisei thu Mizoram Weightlifting Association (MWA) chuan an sawi a, duhsakna an hlan bawk.

Suva khawpuia inelna neih turah hian Indian Weightlifting Federation (IWF) chuan ritchawi chak 21 a tir a, an zinga pakua hi hmeichhia an ni.

Bungzung tlangval, Ruatfela hi kum 2019 khan Mizoram Weightlifting Academy, Ramhlun Sports Complex-ah Zohmangaiha, Mizoram State Sports Council (MSSC) Weightlifting NIS coach atanga inzir chhuak niin April, 2023 khan National Centre of Excellence (NCOE), Patiala, Punjab-ah training turin an thlang a. Tun thlengin Patiala-ah hian national camp-ah la awm awmin Inrinni tlai khan inelnaa inlan turin India an chhuansan.

Ruatfela hian nikuma Noida, Uttar Pradesh-a India-in Commonwealth Youth Weightlifting Championships a thlen khan kg 81 huangah India tan gold medal a lo la tawh a, kuminah hian a aia huang puitling zawkah a inlan zui leh dawn ta a ni.

India ram chhung bikah pawh medal a lo la nual tawh a. Nikum vek khan Madhya Pradesh-a 5th Khelo Youth Games-ah leh Sub Junior National Championship, Arunachal Pradesh-ah kg 81 huangah silver medal ve ve a la.

Kum 2022 khan Shillong, Meghalaya-a North East Games-ah leh Tamil Nadu-a Sub Junior National-ah gold medal ve ve a la tawh bawk.