Commonwealth Youth Games-a gold medalist leh Asian Youth Weightlifting Championship-a palina, Lalruatfela chu Thawhlehni khan Mizoramah a haw a, pawl hrang hrang leh an khawtlang hruaituten an lo hmuak.

Ruatfela hi Lengpui Airport-ah Mizoram Weightlifting Association (MWA) leh Bungzung VC bakah Aizawla Bunzung Zirlai Pawl leh welfare ten an lo hmuak a ni.

July 12-16, 2023 chhunga Noida, Uttar Pradesh-a Commonwealth Youth Games neihah khan Ruatfela hi 81 kg huangah gold a la.

Noida-ah vek July 28-August 5, 2023 chhunga Asian Youth Weightlifting Championships-ah Bungzung tlangval hian 81 kg huangah tho inlanin palina dinhmun a hauh bawk.

Asian Youth Weightlifting Championship-ah hian Snatch-ah kg 125, Clean & Jerk-ah kg 157 chawiin a vaiin kg 282 a chawi a. Ermatov Diyorbek, Uzbekistan; Salehi Pour Lliya, Iran leh Alkateb Mohamad, Syria te a tluk phak lo a ni.

Hemi hma, February thlaa 5th Khelo Youth Games 2023, Madhya Pradesh-ah khan 81 kg youth-ah silver medal a lo la tawh a. North East Games 2022-ah leh Sub Junior National 2023-ah gold medal a la tawh bawk.

Ruatfela hian kum 2019-ah Mizoram Weightlifting Academy zawmin April thla khan National Centre of Excellence (NCOE), Patiala, Punjab-ah training turin an rawn thlang bawk.

MWA hian National Weightlifting Championship thlengtu tura tihfel tawh, Kerala an inhnuhdawh thut avangin Indian Weightlifting Federation (IWF) nen indawrin thlen tumin hma an la mek.

Chief Minister Zoramthanga pawh an hmu tawh a, championship thleng tura an mamawh hrang hrangte thlenin hma a theih anga hma lakpui zel a tum.

India ram pum huap inelna thlen an tum chungchangah hian MWA General Secretary Malsawma Khiangte chuan, “Mizoten rit chawi chak tak tak kan nei tawh a. Jeremy-a, Lalchhanhimi leh Lalruatfela bakah mi dang pawh an awm nual a, heng mite hi Mizote hmai hmaah ngei an che vel lantir se tih kan duh a ni,” tiin ZALEN a lo hrilh tawh.