Aizawl: Mizorama tui in tur siamtu company 4 - Zo Aqua, Brook, Amawii leh Koinonia te chuan Food Safety & Standards Act, 2006 endikna an paltlang zawh loh avangin an tui siam chhuah market-a pekchhuah tawhte an la kir. August 18, 2017 khan Health & Family Welfare Department (H&FW) hnuaia Food Safety Commissioner chuan hriattirna a chhuah a. Hetah hian Mizorama tui in tur siamtu company 4 - Zo Aqua, Brook, Amawii leh Koinonia te chu Food Safety & Standards Act, 2006 in standard a siam an phak loh thu tarlan a ni a. Hemi avang hian Food Safety Authority of Mizoram chuan thla 1 chhung tui siam chhuah hna chawl tur leh dawra an thil siam zawrh tura an pek chhuah sa la let leh vek turin a hriattir a, dawrkaite pawh mipui hnena hralh chhuak lo turin a hriattir bawk. Hemi chung-changah hian H&FW-a Food & Drug lam hotute chuan mipuite tan chiaina tur a awm lo tih an sawi a. “Standard phak kan tumna a ni a, ei leh in thianghlim kan neih theih nana hmalakna a ni,” tiin Zalen an hrilh. Standard phak lohna chu ‘microbial count’-ah a nih thu sawiin Food & Drug hotute chuan thla khat chhung khawl leh hmanruate uluk zawka tifai turin an ti a, an inpeih veleh test-sak an nih leh dawn thu an sawi bawk. Zo Aqua Manager chuan Zalen zawhna chhangin hlauhawm lutuk a awm loh thu a sawi a. Dan anga tlin a ngaih avanga hetiang hi thleng a nih thu sawiin company dang te nena an tlin lohna chu tlemte chauh a nih thu a sawi a. “September 17, 2017 hma zawng chu tui siam chhuah hna chawl turin min ti a, market-a mi pawh theih ang ang kan kokir dawn a, tanky leh hmanraw dang te kan tifai ang a, kan tlin leh theih nan theihtawp kan chhuah dawn,” tiin a sawi bawk. Amawii lam hotute chuan tui pek chhuah hna an chawlhsan nghal tih sawiin an tui siam chhuah market-a pekchhuahten standard an phak thu Zalen an hrilh a. Market-a hralh chhuah lem loh meeting atana order 300ml chu nikhat khawl lam chian loh avangin a lo nawi deuh a. Chu chu thuneituten lo hriain midang an hrem rualin an hrem ta niin an sawi. Nikhat thil thu a engkim tihfel theih a nih loh thu sawiin tui pekchhuah tawhte lak kir hna an kalpui nghal thu an sawi bawk. Koinonia leh Brook te hi Zalen-in a be pawp thei lo a, tui siamtu company dangte leh phai atanga lo lutte pawh en dik zel an tum thu H&FW chuan an sawi.