Aizawl: MPCC Communication Department Chairman PC Laltlansanga chuan, “Kan hmalawk MLA inthlan lo awm leh turah hian Pathian leh mipui zarah Congress party kan sawrkar leh ngei dawn a ni,” a ti. Nimin Phunchawnga an party zawm thar lawmluhna hunah he thu hi sawiin PC Laltlansanga chuan, “Congress party hian chhim lam MLA bial 12 hi la fai vek thei dinhmunah kan ding mek a, a chhe berah bial 10 chu kan la ngei dawn a. A bak bial 11 chu Aizawl District, Serchhip, Champhai, Mamit leh Kolasib District atangtein kan daih hrim hrim dawn a ni,” a ti a. “MNF MLA 5 neih mek te hi tlingkim leh  vek pawh ni se sawrkar turin  MLA 16 an duh belh a. An tling kim tawh dawn lo lehnghal a. An tan sawrkar ngaihna a awm lo a, Lal Thanhawla kaihhruai sawrkar a ding leh ngei dawn a. Pathian leh mipui zarah Aizawl West I bial pawh hian MLA thar a nei dawn a ni,” a ti. PC Laltlansanga chuan MNF party chu MIP cheng singnga sem intiama an sawrkar hnuah cheng 4500 chauh sem leh site an ni tiin an policy SEDP chu hralh a kal lo hle niin a sawi bawk.