ZALEN August 12, 2026 : MPCC Sr. Vice President Lalnunmawia Chuaungo; MPCC Vice President pahnih C. Ngunlianchunga, MLA & Zodintluanga, Ex-Minister leh Congress Party hruaitute chuan vawiin khan Hrangturzo bial chhunga khaw hrang hrang an tlawh.

MPCC Sr. Vice President Lalnunmawia Chuaungo chuan, ZPM sawrkar chungchang sawiin, ZPM te chuan inthlan campaign laiin, keini chu kan danglam dawn tiin thil tha ti turin an in zuar a. Mipuiten beiseina sang tak nen an thlang tling a. Restricted Tender pawh tih reh an intiam a ni. An term chanve an hmang zo tawh. An thutiam ah an ding em, a chhe lamah sawrkar kal tawhte an khum chiang hle a ni. ZPM Sawrkar hian enge Mizoram tana an thawh? Hun kal tawh min thlirpui ula, Congress hian a thutiam hi a bawhchhe ve ngai lova, mipui bum zawngin thu an sawi ve ngailo a ti.

Lalnunmawia Chuaungo chuan, NLUP ah cheng nuai khat an zawrh lai khan, khawia pawisa mah an sem lovang, a theih loh tiin an sawi ṭhin. Congress chu a lo sawrkar ta a, NLUP chu a intiamna ang ngeiin an sem a ni. Tunah hian mipuiin lei rem an rah theihna turin NLUP changtlung leh ṭha zawk buatsaih leh mek a ni. Ramin hmasawnna lian tham a neih leh theihna turin Congress a sawrkar a ngai a ni, a ti.

MPCC Sr. Vice President chuan, MNF hotupa ni mek hi ZPM a an hotupa chuan Not Normal tiin a lo sawi tawh a. Ni e, dawt thu a sawi tam a. Nimahsela, Not Normal tia sawitu a rawn CM ve a, ama thusawi inkalh a tam em em a. Ram hruaitu atan hian dawt sawi ngailo kan mamawh a ni. An duh duha dawtsawi ṭhinte hian mipui min tham lova, heng mite hi ramin a mamawh lova, an hnawl a ngai tak zet a ni, a ti.

MPCC Vice President C. Ngunlianchunga, MLA chuan, "ZPM an sawrkar atangin dawt thu kan hre tam hle a. Kan CM lah amah leh amah a in hnial tam em a. A nihna takah chuan Laifa ka ni a. Kan unaute Myanmar lamah tam tak an awm. Chung kan unaute chuan Pu Duhoma an support em em a, mahse, kan CM chu USA-a a zuk kal khan Arakan Army te an hlauhawm thu a sawi khan kan unaute a ti thinur em em a ni. CM chu Mizo mipuite min thlamuantu tur a nih laiin ILP chungchangah leh Article 371(G) hmangtein mipui min ti thlabar a, CM nihna leh dinhmun hi a hre chiang lo hle a ni," a ti.

MPCC Vice President tho Zodintluanga Ralte pawhin thu sawiin, mi ṭhenkhatten Congress chu Central-a an sawrkar hunah Mizoramah sawrkar leh chauh ang, tiin an sawi. Central-a pawl pawh zuk nei lo, PC te, MNF te, ZPM te pawh an sawrkar thei a nih chuan Central-a sawrkar kher lo pawhin Mizoramah sawrkar thei an nih thu a sawi.

MPCC Vice President Zodintluanga Ralte chuan, "MNF hotupa leh tuna kan CM ni mek hi BJP a intlaktlum tumin Delhi BJP an intlawn siak a. Nimahsela, BJP ten kan Pathian pawi an sawi a. Sawrkar nghet lo takin a awm chho ṭan mek a ni. Sawrkar nghet ṭha tak ni ṭhin kha, Pathianin kut a rawn thawh a, BJP sawrkar chu sawrkar tlak tawh lo angin tunah hian India mipuite hian an hmu mek a. Home Minister Amit Shah chu Parliament ah vawiin ni thlengin a la kal ngam lo. Kan hotupa Rahul Gandhi erawh ṭhalaiin a kalna lamah an bawh hum hum a. India ṭhalaite hian Rahul Gandhi hi chance kan pek a ngai tawh. Ani hian India ram hi min kaihhruai rawh se, an ti a ni," a ti.

Zodintluanga chuan, "NEET paper leak avangin India ram ṭhalaite an pungkhawm a. Tunah hian MPSC hnalak chungchangah thil dik lo tak awmin a tling tawh te, in tling leh lo e, an ti a, a tling lo te, in tling leh si e, an tih avangte, tih sual leh siamṭhat ngai an neih tam lutuk avangin kan Mizo zirlaite MPSC Office tual zawlah an pungkhawm leh mek a ni. Hetiang thil hi Mizoramin kan la tawng ngailo a, hei hi sawrkar inthlahdah vang a ni a. Nimin piah lawkah kan CM chuan Human Rights Commission avangin khawtlang then a harsa ang, tih a sawi a. Engati nge kan CM hian Human Rights Commission hi hnawk a tih viau? Law & Order a kenkawh zawh loh vang em ni, tih hi ka zawhna a ni," a ti bawk.