Aizawl February 23, 2024 : Vawiin khan Congress Party chuan Congress Bhavan-ah ‘Friday Political Session’ an hmang a. He hunah hian MPCC OB thlan thar te charge inhlanna hun hman a ni a. EM thlan thar te certificate hlanna hun hman a ni bawk.

He hunah hian President atana thlan thar Lal Thanzara chuan Party inthlanna felfai tak an neih theih avangin Pathian hnenah lawmthu a sawi a. Inthlanna engkim felfai taka siamtu GAD te hnenah lawmthu a sawi a. Election Department hnenah lawmthu a sawi bawk a. Inthlan min buaipui sak tu te hnenah RO leh PO te felfai taka inthlan min neihpui avangin lawmthu a sawi a ni.

MPCC President chuan, "Zoram dung leh vang chhim chhak thlang atanga inthlanna neih tura lokal palai te hnenah lawmthu ka sawi a. MPCC OB ni tura Pu Lalnunmawia Chuaungo leh Dr. Lalmalsawma Nghaka te nena min vote tute chungah lawmthu ka sawi a ni. Campaign laia tawngkam duhthawh deuh midang tana hriat nuam lo kan tih a awm chuan min theihnghilhsak turin ka nge che u a ni," a ti.

Patea chuan, "Kan OB tling lo te pawh kan hruaitute in la ni reng dawn a, min tanpuina kan ngen a, khawharin in awm lovang tih ka tiam che u a ni. Executive a tling lo te, in zavaiin party a hmalakna min thawhpui zel turin ka ngen che u a ni. Kan senior Lal Thanhawla, CWC member leh C. Chawngkunga ten min la uap zel hi thla muan thlak ka ti a ni," a ti bawk.

MLA inthlanah a hlawhtlinpui lo avangin ngaihdamna a dil. India ramah nekchepna leh tihduhna a nasa zelah ram leh hnam, sakhua chawikana humhim a nih theih nan Mizo mipui te a sawm a. MP inthlan lo awm turah Mizoram leh India ah INC in hlawhtlinna a chan ngei theih nan thawkho a duh thu sawiin Hun thar an kai a, tumah in eilo awm lo va, tangruala ke pen zel turin a sawm bawk.

Vice President Lalnunmawia Chuaungo pawhin thu sawiin, "Min vote tu te chungah lawmthu ka sawi a, min vote lo tute chungah pawh lawm thu ka sawi a ni. Min duh lo tihna a ni lo va, kei aia duh an nei zawk tihna mai a ni a, min duh lo tihna a ni reng reng lo," tiin, "Kan president thlan Pu Lalthanzara hi Cabinet minister kum sawm chuang a ni chungin a thiltih that te tlangaupui chi a ni lo. Miharsa leh chanhai te tan pa nih a tling a. Kan ram kaihruai tura mi tling a ni. A kaihza kan veng ang, theihtawp kan chhuah ang, a hovin ram rorelna sawrkar pawh kan din ngei kan beisei a ni," a ti.

Treasurer Dr. Lalmalsawma Nghaka chuan sawmna siamin, "Congress party tho chhuak leh turin pheikhai rualin pen chhuak leh ang u. Zokhua lam kan party hruaitute pawh tunah chuan kan thu leh hla ringawt ngaichang lovin in thu leh hla headquarter hian kan ngaihtla thung dawn a ni. Tunah chuan innghaithla tawnin, kan unit leh veng chhunga party mi leh sa te thu leh hla pawh ngaithla thiam ang u," a ti ve bawk.

President kal chhuak Lalsawta pawhin Congress Party ah hruai tha tak tak a nei ta. Hnah hlui ni tawh mah ila, That loh theih lohna bawm hi rawn ngai pawimawh hram rawh u, tiin sorkar tha nei tura that loh theih lohna pawimawhna a sawi a ni.