Aizawl September 30, 2024 : Congress chuan Mamit District-a Rajiv Nagar khuaa Farmer Society te inchhunfin tira sawrkar hmalakna a inthlang, ZPM Unit ten an pawm loh avanga hotu ruat that a nih dana Agriculture Minister leh ZPM Secretary H. Zorempuia leh te hmalak dan chu hriatthiam har an ti.

MPCC Treasurer Dr. Lalmalsawma Nghaka chuan thlai thar lei programme hi tihlawhtling turin khawtinah farmer society an din chho mek a. Khaw tam takah Farmer Society an lo din tawhna awm mah se, chungte chu hlamchhiah in ZPM Unit te kaihhruai in Society hi an din zel a. He mi chungchangah hian thil diklo tamtak thingtlang lam atangin an dawng a, chung zinga pakhat, Mamit District-a Rajiv Nagar khua a thil thleng hi a ni, a ti.

Rajiv Nagar-ah hian Broom Society hi pathum a awm tawh sa pawm lovin ZPM sawrkar hian Co-operative Farming Society, Rajiv Nagar-I a inchhunfin turin Land Resource, Soil & Water Conservation Director Hualthanga Chhakchhuak hmangin July 11, 2024 hmangin heng Society awmsa te hi hriattir an ni a. Inchhunfin a ngaih chhan chu Society pathum an awm kha sawrkar hnuaia Agriculture Marketing Assurance Fund Management Board (AMAFMB) duhdan kalh anih vang anih thu ziah a ni.

He lehkha bawhzui hian LRS&WC Director bawk hian Rajiv Nagar-l Broom Grower Society inthlanna nei turin Office Order, Memo no.B.14015/1/2024-DTE(LRS&WC) hmangin a hriattir nghal a, inthlanpui tur pawh Department mi leh sa 3 an ruat nghal bawk a ni. He Office Order bawhzui hian Dt 6/8/2024 khan YCA Hall, Rajiv Nagar - l ah C. Rinsangpuia ASCE, PC Lalremsiama DO (Mamit) leh Lalrammuana Sailo RO te kaihhruaiin inthlanna an nei ta a ni.

Heta an thlanchhuah te hi ZPM VC Bahulal Chakma te chuan an pawm thei lova, ZPM hotute hnenah an zualko a. ZPM tana Mamit bial viltu H. Zorempuia, Secretary, ZPM chuan Department changtu Minister hmuiin recomendation an la a, society member te thlan ni lo Bahulal Chakma chu Society hruaitu ah hian an ruat ta a ni.

MPCC Treasurer chuan, "Rajiv Nagar-a Hmunphiah chingtu Society a tel te chuan an pawm thei lova, hriatthiam harsa an ti hle a ni. Agriculture Minister in hetia a ti ta mai leh, VC member pakhat leh ZPM Party Secretary te duh dana a kal ta mai hi, a ngaihna a hriat loh zia leh, mi pahnih khat duh dan angin an kal mai a, sawrkar officials ngei te ruahmanna siam pawh zah zo lo khawpa huaisenna a nei lo hian, mipui nawlpuite huap zo lo, party bil uchuak taka a duhsakna thil a ti ta mai hi a pawi hle a ni," a ti.