ZALEN October 19, 2023 : Vawiin khan MPCC President Lalsawtachuan MLA General Election 2023 atan Aizawl West-III bial INC Candidate a nihna Nomination a file a. He hunah hian Congress Party hruaitu ten an tawiawm a ni. Lalsawta hian nomination a file hmaa chanchinbu mi ten an kawm naah Meriam L. Hrangchal chu an party leh Mizoram tan rohlu (asset) niin an hriat thu a sawi.

Chanchinbu mite zawhna chhangin Lalsawta chuan, "MLA General Election 2023 hian Congress Party chuan hnehna chan a 'Sorkar tha' siam ngei kan tum a. Aizawl West-III bialah pawh hian mipui tha tak tak zarah ka chak ngei ang," a ti.

Meriam L. Hrangchal chungchanga chanchinbu mite zawhna chhangin Lalsawta chuan, "Pi Meriam-i hi Congress hian candidate atan kan duh em em, mi tangkai tur a ni tih kan hria a. Chuvangin, a ni hi Candidate ah kan dah a ni. Lo engto tu an awm ngei ang tih pawh kan ring a. Bial tinah hian Congress hi ding lo vek phei ila chuan tam tak hi an lawmin ka ring a, Party dang tam tak pawh hi an lawm ngei ang. Pi Meriam-i chungchang hi kan party chuan kan ngaihtuah ngun a. Chuvangin, kan party tan chauh ni lovin Mizoram tana rohlu (asset) nia kan hriat avangin kan din tir a ni," a ti bawk.

Lalsawta, President MPCC chuan AICC hotute zinga mi Shri Rahul Gandhi rawn kalin boruak a siam hle a. Chubakah khati zat mipuiin an ngaisang a, an lawm em em a. An chhungkaw ngilneihzia leh Mizo min hmangaihzia a lang chiang hlein ka hria a. Nasa takin Congress Party min ti chak a, hma min sawn tir a ni, a ti bawk.

Mizoram mipuiten Sakhaw Zalenna duhtu Congress Party ina kan Official Candidate bial hrang hranga mite hi lo VOTE tling theuh turin ka sawm che u a, BJP thawhpui ve ngai lo tur leh Mizoram hmasawnna atana hnathawk tak tak tur Party hi min lo Vote theuh rawh u, a ti bawk.