Aizawl: MNF General Headquarters chuan Chakma Autonomous District Council huam chhunga Chawngte C bulah Congress sawrkarin zu siamna factory a din mek niin an sawi. Nimin khan Aizawl Press Club-ah chanchinbumite kawmin MNF General Secretary i/c Er R.Rohmingliana chuan Zu Factory hi Udalthana Road, Chawngte C, District Council Tuikhuah bulah bun mek niin a sawi a, a building tur pawh Contractor sak tir niin a sa zo tawh a, zu siamna tur khawl chi hrang hrang pawh chah thlen tawh niin building chhungah hian dah luh a ni tawh niin a sawi bawk. MNF General Secretary chuan zu siam chhuahna tura a khawl bun hna (Installation) chiah hmabak a ni tawh tih sawiin factory-ina a mamawh tur electric buaipui mek a ni tiin zu factory hi kumin chhung ngei hian bun fel a, zu siamchhuah tan an tum nia an hriat thu an sawi bawk. MNF General Secretary chuan zu factory chu Chakma Autonomous District Council (CADC) CEM Kali Kumar Tongchongya hunlai atanga bultan niin an sawi a. Zu factory din hna hi a ruk thei ang bera sawrkar in a kalpui avangin mipuiin an hre zau lo hle niin a sawi a. “Kohhran leh khawtlang kan mangan em em laia zu zawrh mai duh tawk lova zu siamna hmunpui, Factory hial Zoram chhung ngeiah din a ni ta mek hi MNF chuan pawi a ti tak zet a. Congress sawrkar hian he zu factory a din mek hi tihlawhtling lo hram turin MNF party chuan an ngen a ni,” a ti bawk. Press mite zawhna chhangin MNF hruaitute chuan zu factory chu sawrkar sum hmang ngeia sak a ni tiin cheng nuai 100 hmangin 1st class contractor RV Hluna Edenthar veng chuan a building hi a sa niin an sawi bawk.