ZALEN November 2, 2023 : Congress party chuan ngaih pawimawh bera a neih chu ram, hnam leh sakhua himna tur a ni a. Hengte hi a him lo a nih chuan hmasawnna hi awmze nei lovah an ngaih thu an sawi. "Mizo Kristian tana hlauhawm chu Hindutva ideology kalpuitu BJP te hi an ni a. India ram Hindu lal rama din tum tute hi vulh len tum chi ah a ngai lo," an ti.

Hetihlai hian political party zingah BJP te nena inmawngzawm hreh hauh lo an awm reng chu pawi an tih thu an sawi a, heng party te hian ram leh hnam hralh an pawiti hauh lovah an ngaih thu an sawi bawk.

Congress chuan, "BJP leh ZPM hotu Lalduhoma inlaichhina hi thilthar a ni lem lo a, kum 2014 March thla daih tawh khan Lalduhoma leh BJP te hian thawhhona thuthlung an lo ziak tawh a. Kum 2015 kuma AMC Election leh Aizawl North –III bye-election ah pawh khan Lalduhawma leh a hote hi NDA Candidate angin election an lo contest daih tawh a ni," an ti.

Phone call leak out atangin Duhoma hian BJP te hi a thawhpui hreh loh thu leh BJP Mizorama an len theihna tur daltu lian tak chu MNF annih thu a lo sawi tawh an ti bawk.

Congress chuan, "Tunhnaiah ZPM hotupa thurawn an rawn ngaihpawimawh ta viau nge ni BJP sawrkar chuan Income Tax official te rawn tirin CM Pu Zoramthanga tana tangkai tak Kamrul Laksar In te an rawn dap tih hriattur a awm ta hial a ni," ti.

BJP hian an party malin kua an hreuh theihlohna tur nia an hriat Mizoram bakah India ram state dangah pawh regional party te thawhpuiin sawrkarna chang anga tarlan hi an chin than pakhat a ni an ti.

RSS/BJP leh an Hindutva politics a tira atanga dodal tluan chhuak awm chu Congress party chauh a ni an ti a, "He thuthlung hi Congress chuan thuneihna chan chak satliah vangin kan hralh ve thiang lo a, kan hralh ve ngai dawn bawk lo a ni," an ti bawk.