ZALEN January 30, 2026: Mizoram Pradesh Congress Committee chuan Central Sawrkarin MGNREGA nuai bo a tum vang te, India rama Kristiante tihduhdahna hluar zel duh loh vang te, Lengpui Airport bul ram inleinaa thil dik lo leh eirukna awm anga lang puangzar tura Mizoram sawrkar nawr nan te 'Kawngzawh pui' vawiin khan an huaihawt a, Chanmari atanga Vanapa Hall kawt thleng kawng hi an zawh a ni.

He kawngzawhah hian MPCC President Lal Thanzara chuan, "ZPM sawrkar hian India rama Kristiante tihduhdah leh nekchepna thleng mekah aw an chhuah ngam lo leh ni 100 inhlawhna BJP sawrkarin a pawngsual a, mipui tana ZPM a au chhuak ngam lo hi a lungchhiathlak hle a ni. Lengpui Airport bul ram IAF hnenah dik lo taka hralh a nih chungchangah engmah thudik mipui hmaah an puan ngam loh vanga ni sensa hnuaiah kawngzawh a ngai hi thil zahthlak tak a ni." 

"Pathian zarah kan sawrkar chuan Kohhran aiawhin kan ding ang a, MNF leh ZPM sawrkar tihdik loh te kan siamtha ang a, NLUP hi changtlung zawkin kan hotuten an kalpui dawn a ni. Chutiang anih theih nan chuan mipuite min pui turin ka sawm a che u." a ti. Thahnemngai taka pen chhuak te chibai a buk bawk.

Kawng zawh tanna Chanmari-a thusawitu MPCC Treasurer Dr. Lalmalsawma chuan, "Ni za inhlawhna, MNREGS hi thingtlang mite tan a tangkai in chhungkaw tamtak innghahna a ni a, hetia Centrala BJP sawrkarin tihtawp a tum hi thil pawi tak a ni. He thil hian India ram mai ni lo, Mizorama thingtlang mi harsa tak tak te a nghawng dawn a ni. ZPM Social media worker ho chuan ni za inhlawhna hi thatchhiat inzirtirna tiin an sawi a, thingtlang mi harsa tak tak te hi mi thatchhia an ni lo tih ka sawi duh."

"Lengpui Airport bula ram hralh chungchangah Hriata Chhangte chuan, Mantang eitu ber in, 'Mantang eitu ber in he pawisa hi ka chan vek tur a ni lo, mantang eitu dang ka pek ve a ngai a lawm a ti,' tiin a sawi a, chutiang thil diklo chu kan sawrkar hian a enliam mai mai dawn em ni?," a ti.

"India ram hmun hrang hrangah tunhnaiah Kristiante tihduhdahna a hluar nasa em em a, Krismas an hmanna te tihbuai an ni bawk. Hmanni a Odisha Pastor chunga thil thlengah pawh khan Meghalaya CM te, Kerala CM te chuan an auchhuahpui anih kha, kan sawrkar hian aupui ve se kan duh a, NEDA member MNF pawh hian aupui ve se kan duh a ni." a ti bawk.

He kawngzawh ah hian kalkhawm te chuan Resolution 3 an pass a, chungte chu :-

1. BJP Sawrkar-in MGNREGA ( ni za inhlawhna), G-RAM-G-a a thlak hi MPCC chuan India hnam pa Pu Mahatma Gandhi hming paih bo tumnaah a ngai a, a dem takzet a ni. Tin, State sawrkar tum ve tur 10% hi Mizoram Sawrkar-in a pek theih loh phei chuan kalpui theih a ni dawn lo a, mi retheite tan a pawi hle dawn a ni.

Tin, MGNREGA (ni 100 aia tlem lo inhlawhna) kha chu sawrkarin mi rethei zawkte hnena a tih ngei ngei tura duan, mipui right (guarantee) a ni a. G-RAM-G erawh hi chu sum awm dan a zira kalpui tur a ni ringawt tawh a, mipui tan a him lo zawk daih a ni. Chuvangin, a rang thei ang ber a MGNREGA a let leh vat tura Central sawrkar nawr turin ZPM Sawrkar kan phut a ni.

2. Lengpui Airport bul ram hralh leh lei chungchangah hian eirukna lian tham tak a awm niin a lang a. Hemi chungchanga thudik tak hriat hi mipuite chanvo a nih angin Mizoram Sawrkar hian a rang thei ang berin thudik puangchhuak thuai rawh rawh se. Tin, an party hruaitute zingah man tang ei an awm leh awm loh a rang thei ang bera puang turin ZPM leh MNF Party-te hi kan phut bawk a ni.

3. BJP leh a thawhpuiten sorkarna an chan a\anga India rama Kristian-te tih duh dahna nasa taka lo pung ta hi Congress Party chuan kan dem takzet a. Sakhaw Zalenna ram kan nih ang ngei a Kristian-te tih duh dahna hi ti tawp nghal turin BJP Sawrkar kan phut a, Kristian Chief Minister dangte anga Christian-te thlavang hauh a che chhuak ve tawh turin Mizoram Chief Minister kan phut a ni.