Congress-in Loneitute eizawnna zirhona nei
Feb 24, 2023

Aizawl February 24, 2023: Congress chuan Vawiin khan Golden Hall, Congress Bhawan-ah Friday Political Session an nei a, he hunah hian Dr. C. Lalengzama, Asst. Professor, Department of Social Worker, Mizoram University chuan 'Mizoram Loneitute Eizawnna; An harsatnate leh hmalak Dan tur' tih thupui hmang power Presentation hmangin zirtirna a pe. MPCC Vice President Lal Thanzara chuan mithar lawmluhna hun a hmang bawk.

Dr. C. Lalengzama chuan, "Mizote hi Kan lo neih leh kan sakhua te hi a inzawm. Kum zabi 18-na atangin lo neih hi kan ching tawh, tih a sawi a. Farmer tih hian loneitute chauh ni lo, ran vulhtute a huam. Hemi chungchangah kan pi leh pute khan ruahmanna an siam thiam hle a. Thingtlang lo neih atangin huan lo ram nghet neih lamah kan insawn mek a. NLUP in thingtlang lo neih a ti tlahniam a, chutihrualin lo neih tih hmasawn a ni tawk lo a, hlawk si lova lo neih leh huan siam aiin inhlawh zawngin kan kal a. Tuna kan kal danah ram zau nei ram a zau tial tial a, ram zimte nei a zim tial tial a, ram nei lovin mi ramah an inhlawh a ngaih phah," a ti.

Loneih lamah kan ram leilung rem lo kan ngah avangin harsatna a siam, hemi harsatna mila hmanrua lak leh ruahmana siam thiam a ngai. Tualchhunga hralh chhuahna mumal tak siam hi khawvel huapa kan inphochhuahna kal kawng pawimawh a ni. Entrepreneurship hian agricultural lam hawi a pawimawh, lo neih hmasawnna lama beisei anga hma kan sawn loh chhan chu sawrkar department te an thawkho tha tawk lo. Mumal taka tharchhuah hralhna tur ruahman a tul. Election Manifesto a kan neih hian kan ti tha a ni lo, kan tihtur sa kan ti tan chauh a ni. Thui tak kala hlawhtling tura mawhphurhna neitu nih inhriat a tul. Loneitute sum lakluh a pung em, sum hmanral a pung em, sum khawl a pung nge a hniam tih sawiin, Thingtlang lo neih tih hmasawna a hlawhtlinna kuthnathawktuten an neih theihna turin Zirchianna uluk taka nei chunga ruahmanna siam a ngai. Mithiam leh theihna bik kan neihte ngaihtuahna ataka hmang tangkaitu Party nih a tul, a ti bawk. 

Lal Thanzara chuan, Thalai rilru fim leh ngaihtuahna nasa tak hmangtute'n Sorkar tha siam tura Congress party an zawm zel chuan Congress party ah mipuiin rinna an nghah zia tilangtu a ni a. Nitin Mizoram tana sorkar tha kan siam hun a hnai zel a ni, a ti a. Congress party tana thawk ni mai loa, ram tana thawktu ni tur leh Congress party chu Mizoram mipui te in pui a ni a, mahni in puiah thlamuang leh hlim taka awm turin kan lawm lut che u a ni, a ti. 

Latest News & Chhiar Hlawh