Aizawl August 28, 2024 : Congress chuan thuchhuah siamin, "Mizoram sawrkar hian Unified Pension Scheme (UPS) hi engtin nge a kalpui dawn an la sawi lova, He Pension Scheme thar hi sawrkar hnathawk te tan arang thei ang bera an kalpui ve ngei kan beiseiin kan phut a ni," an ti.

Congress chuan NDA sawrkar chuan kum 21 chhung lai hman AB Vajpayee sorkar laia an siam New Pension Scheme chu thiatin Congres in Manifesto-a kan lo neih Old Pension Scheme nena in ang tak 'Unified Pension Scheme' (UPS) chu hman turin an siam thar a, he scheme hnuaiah hian sawrkar hnathawk te chuan an pension hmaa an hlawh lak hnuhnun ber atanga 50% chu pension atan an la zui thei tawh dawn a ni, an ti.

MPCC chuan, "BJP kaihhruai NDA sawrkar in sawrkar hnathawk te tana pawi leh tha lo tak NPS hnawla Congress manifesto zulzuia UPS a kalpui tur hi Congress party chuan lawmawm kan ti a, mipuite hmasawnna leh hamthatna tur ruahmanna siam leh kalpuiah chuan Congress party bawk a chungnun zia pholannaah kan ngai a ni," an ti.

Assembly Election hnuhnung berah khan Congress chuan an Manifesto ah Old Pension Scheme kalpui leh hi an telh a, India ram State hrang hranga Congress sawrkar leh an tel vena sawrkar ah chuan Old Pension Scheme hi an kalpui leh vek tawh a ni. NPS hi a duh tan chuan la hman theih tho a ni dawn a, Central in State te kutah a dah a ni.

UPS hman tura tih hma hian Opposition Congress rorelna state panga te chuan NPS hnawlin an hnathawk te chu Old Pension Scheme (OPS) an pension ruala an hlawh lak hnuhnun ber atanga 50% lak theihnaah an luhpui vek hman a ni.

UPS hi Union Cabinet chuan August 24, 2024 khan a pawm fel ta a, inflation trend milin dearness relief tihsan thin a ni ang a, sawrkar hnathawk an boralin a chhung ten family pension 60% la thei dawnin retirement dawnah gratuity benefits lumpsum superanuation payout a la thei dawn bawk a. Hei mai bakah hian central sawrkar hnuai hnathawk kum 10 chuang service tawh te chuan a tlem berah pension tlatin Rs 10,000 an la dawn bawk.

UPS Union Cabinet in a pawm tak hi April 1, 2025 atangin State tena an duh a nih chuan an hman tan theih tur a ni bawk a. OPS leh UPS danglamna ber chu OPS chu liabilities niin employees emaw employer ten emaw contribution an neih a ngai lova, UPS ah erawh contributory scheme ni dawnin sawrkar hnathawk te chuan an hlawh atangin 10% pe in sorkar in 18.5% a tum thung dawn a ni.