Aizawl; MNF Party chuan Congress Party chu NLUP hlawhchhamna bak sawi tur an nei lo ah an puh. Congress Party in NLUP chungchangah Mizoram opposition party ten central sorkarah an hêk nia thuchhuah an siam chu sawifiahin MNF chuan NLUP hi a tir atangin Congress ah Rs. 2/- peka cheng nuai khat dawng tura inzirtirin ru-sum an thlak a, an inzawrhna hretute chu Zoram mipuite kan nih avangin, a hrang a hraia zuk hêk kher an ngai lem lo va, mipui sum ni si, party bil ta anga an hmang erawh a dik loh thu sawi hi chu, khua leh tuite tih tur a ni, an ti. NLUP chu PM Special package ni lovin Plan sum ami a ni tih an sawi nawn a, hei hi Finance Minister P.Chidambaram leh Ministry of Finance a Addl. Secretary Anjuly Chib Dugghal ngei pawhin an sawichiang a. Synod in a zirchianna ah pawh NLUP dawngtu 99.256% chu Congress party an ni an ti bawk a. NLUP hlawtlin leh hlawhchham thu pawh sawrkar hnathawkte ni lo vin, a petu leh dawngtu, congress party chu engkima mawhphurtu a ni an ti a. NLUP atan hian cheng vaibelchhe 2800/- hman zawh tep a ni tawh tih sawiin mipui huap lo, congress party induhsakna uchuak tak leh central sorkar sum a thlawna luangral hnem lutuk chungchang hi opposition te chuan tih tawp tir mai tura hma an lak ho hi a hun viau tawh zawk a ni, an ti bawk. Zirtawpni kalta khan Bhavan ah Congress President Lal Thanhawla chuan eptu party 5 President Zoramthanga, Lalduhoma, Lalhmangaiha Sailo, Lalhluna leh PP Thawlla ten kumin July ni 26 khan NLUP chu titawp turin Prime Minister hnenah point 13 ziakin an thlen a, an hekna hi MNF President chuan a bawhzui niin a sawi.