Aizawl March 3, 2023: Congress Party chuan February 23, 2023 a Mizoram Legislative Assembly thutkhawmnaa District Council & Minority Affairs changtu R. Lalzirliana'n Direct Funding chungchanga a sawi, “Lem ang kan va der mai mai a nih kha, saw lamah khan, Congress khan vote zawn nan kan va hmang mai mai a nih kha. Anni hian an lo awih ve em em a, kha chauh kha a ni, a ho tak tak a ni,” tih a sawi chu chhan an tum loh thu leh thudik tarlanna remchangah hman an tum tih thuchhuah an siamah an tarlang.

Minister R. Lalzirliana hian February 27, 2023 ah Assembly House-ah a thusawi avang hian ngaihdam a dil a, DC&MA Department enkawltu a nihna pawh tihdanglam ni se tiin a ngen nghal bawk a. Speaker pawhin a tihsual palha ngaihdam a dil chu a lawmawm a tih thu a sawi zui a ni.

Congress Party chuan Ngaihdam dil ngai khawpa thu a sawi sual, mi thenkhat ten an Party beihna atana an hmang chu ngaihdam diltu leh ngaidamtute tih bawrhbanna a ni an ti a, pawi an tih thu an sawi. "Huat tlakah ngai ila chuan Congress Party hi Pu R. Lalzirliana thusawi haw ber tur kan ni ang. Mahse, thudik tarlanna remchangah kan hmang mai dawn a ni," tiin, "July ni 4 & 15, 2009 khan khatih laia CM Pu Lal Thanhawla leh Mizoram MP (LS) Pu C.L. Ruala-te khan Central sawrkarah direct funding an dilna hi ngenpuina an lo thlen tawh. Ni 17.08.2017-a Council of Ministers Meeting pawhin Cabinet Memo Item No. 10-ah Council of Ministers chuan District Council-te ‘Direct Funding’ pek hi kan thlawp a, a kalphung te, Financial Control Mechanism leh Administrative structure/set-up te chu Govt. of India in duang rawh se, tiin thutlukna an lo dah fel vek tawh a ni," a ti.

MPCC chuan, "District Council-te leh a chhunga cheng hnam hian te Congree hian anmahni hmangaih bertu a ni tih chu anmahni hian an hrechiang a. Kawng hrang hrangin kan la hmangaih chhunzawm zel dawn bawk a ni. Pu R. Lalzirliana’n thu a sawi sual avanga ngaihdam a dilna hi keini MPCC chuan kan ngaidam a, ngaihdam dil ngai lova thu sawi thin tawh turin kan duh bawk a ni," an ti.