Aizawl November 29, 2022 : Laila Hall, College Veng, Siaha-ah Mara District Congress Committee (MDCC) General Assembly vawi 22-na an hman naah MPCC President Lalsawta chuan 2023 General Election-a Siaha biala Congress Party Candidate tûrin N Chakhai MCS (Rtd) a puang a, Congress party-in sawrkar siam a tumna kawnga phur taka hma lo la tûrin MARA Mipui te a sawm a, Kut fai leh thinlung thianghlim takin inthlan an hmachhawn dawn tih a sawi.

MPCC President Lalsawta chuan, "Vawiin a kan kal khawm chhan chu Pathianin he leia Lal Isua lal ram din tura min dah vang ni. Politics-a kan awm chhan chu Mara ram chauh ni lo, Zoram khawvelah a lal ram thlen theihna tura hna pawimawh chelhtute kan nih vang te, ram tha zawk, rorelna tha zawk buatsaih tur leh Pathianin mawhphurhna min pek hlen tura kal khawm leh awm kan ni. Tihtur neih loh vanga kal khawm mai mai kan ni lo," a ti. 

Lalsawta chuan, "Kan ramah neutral tam tak, Kohhran mi leh party mi tam tak kan awm a. Chung chuan nakum 2023 inthlan kan thlir. Congress party chuan hautak lo takin, ram tana hnathawk thei tur, mi tling ngei tur candidate kan chhawp chhuak dawn, an retheih avangin kan hnawl ngawt dawn lo," tih sawiin, "Party dangten inthlana chak zawk nih tumin pawisa cheng nuai zahnih zathum an rinchhan dawn. Keini chuan Kut fai leh thinlung thianghlim takin he inthlan hi kan hmachhawn dawn, pawisa chakna hi tihhlum kan tum a ni. Chutiang a thlen theihna tur leh ram leh hnam tana hna tha an thawh theih nan kan MLA candidate-te ti hautak lo turin ka ngen che u a ni. Thil harsa takah in ngai mai thei, mahse thil tih theih a ni a, Pathian rinchhanin nangni leh keini hian kan ti thei a ni," a ti. 

MADC chungchang sawiin Congress President chuan, "BJP MDC thenkhat leh MNF MDC thenkhat, an thawhpuiten an hriatpui nge hriatpui loh pawh hriat loh ten Mara ram tana hnathawka kan buai laiin min barakhaih thut mai a, kan duh ang chu a ni lo. He thil thlengah hian Congress chu kan buai lo. Congress MDC-te a hma angin nghet takin an la ding reng a ni," tih sawiin, "Mara District Council sawrkar-a thil thlengah Congress MDC palite rinawm tak leh kut fai taka  an awm hi Congress nihphung tur dik a ni. Mara mipui te, Lai mipui te leh Chakma mipuite hi Congress sorkarah chuan dinhmun duhawm leh tha zawk kan ngaihtuah sak dawn che u a ni," a ti a. "Congress chawrno tha leh mek hi Mizoram tan, kan ram tan a ni. Rinawm tak leh dik takin awm ila, tun 2022 Christmas bak hi MNF sawrkar hnuaiah kan hmang tawh dawn lo. Congress party zawm thartute pawh Congress party tan mai ni lo, ram leh hnam tana rinawm taka hnatha thawk turin ka sawm che u a ni," a ti.