Aizawl March 1, 2023: Vawiin khan Congress Party thla tin chhuak chanchinbu ‘RAM KALSIAM’ tih chu Golden Hall, Congress Bhawan-ah MPCC President Lalsawta’n a tlangzarh.

Tlangzarhna a thusawitu MPCC President Lalsawta chuan, “Print Media bikah ABC hian awm ze thuk tak a nei a. ‘A’ (Accurate) hian thuchhuah a ngil tur a ni, a dik tur a ni tih a kawk a, B (Bold) hian chanchinbua thuchhuah chu a huaisen tur a ni tih kawkin C (Correct) pawhin thil dik chauh a chhuah tur a ni, tih a kawk a ni. Mizoramah Mizoram leh Vai Chanchinbu atangin bul kan tan a. Hmasawnna nasa takin min thlen. District Council huna Mizoram mipui min kai harh a, hnam fingah min siam. Vawiin thlengin chanchinbu tha tak tak leh TV channel tha tak tak kan nei a, Mizoram mipui kan vannei hle a ni,” a ti.

Lalsawta chuan Congress Party chanchinbu ‘Ram Kalsiam’ chu Party dang sawichhiatna ni lova, Mizoram mipuite ram hmasawnna kawng dik kawhhmuhtu ni se, Party dangte sawichhiatna ni lovin, thatna kawnga midang zirtirtu ni se a duh thu a sawi bawk.

Chanchinbu tlangzarhna inkhawm hi Dr. Lallianchhunga, Publisher & Spokesperson, MPCC-in a kaihruai a, AICC 85th Plenary Session report a pe bawk. Lianhleia, Jt. Editor in Editorial Board-te inhmelhriattirna hun a hmang a, Editor C. Lalhriatpuia’n chanchinbu chungchang sawifiahna leh sawizauna hun a hmang bawk. Ram Kalsiam chanchinbu hi phek 16 a chhah niin, Rs. 5/- man a ni.