ZALEN September 3, 2026: Mizoram Pradesh Congress Committee (MPCC) chuan Chief Minister -in Govt. Mizoram law College Freshers Social & Felicitation-a a thu sawiah thu diklo tam tak a sawi an ti a, thu diklo sawi tawh lo turin ram hruaitu lûber hi an chah a ni.

MPCC chuan Chief Minister zahawm tak hian tun hnai lawk, July 31, 2026 khan Govt. Mizoram law College Freshers Social & Felicitation neihnaa khuallian nia thusawina a neihah, "371G kha chu khalai inremna thuthlunga ziah kha a ni satliah lo va, India constitution ah dahluh a ni a, India sawrkar-in Constitution Amendment Bill a rawn pulut a, chu Bill ngaihtuahnaa thu sawi ve leh passed-tu te zinga tel ve awmchhun ka ni" tiin a sawi a.

Assembly thutkhawm Ni 27/8/2026 (7th session of 9th Assembly) neihah khan Chief Minister leh House leader zahawm tak Lalduhoma chuan Assembly House zahawm takah 53rd Constitution Amendment Bill 1986 (Art 371G) Lok Sabha a sawihonaah a passed tute zinga mi a ni a, a telve reng tiin a sawi bawk a. Heng thu CM in a sawite hi thudiklo a ni MPCC chuan an ti.

53rd Constitution Amendment Bill 1986 (Art 371G) Lok Sabha a sawihona hi ni 5.8.1986 khan neih a ni a. Hemi ni, Lok Sabha a State of Mizoram Bill sawihona neihnaah hian Pu Lalduhoma'n thu a sawi ve lo. He bill sawihona neiha thusawitu list Parliament Digital Library-ah Notheast MP dangte chu thu an sawi tih record-a a lan laiin Pu Lalduhoma hming hi thusawitu list ah record a awm ve lo, an ti bawk.

MPCC chuan, "Thil chiang tak chu ni 5, August 1986 a State of Mizoram Bill sawiho a niha vote lak a nih khan tuna kan Chief Minister zahawm tak Pu Lalduhoma hi he bill vote tu zingah a tel tarlan a ni lo va, a bill do zawnga vote tu hming zingah pawh a tel lo bawk. 

He bill sawihonaa thusawitu Indian National Congress MP te chu : - Bill puluttu Buta Singh (khatihlaia Home Minister), Mool Chand Daga, Shantaram Naik, Manoranjan Bhakta, Samar Brahma Choudhury, Arvind Netam, Raj Kumar Rai, N. Tombi Singh, V. Kishore Chandra Deo, Jaipal Reddy, Priya Ranjan Dasmunsi, Kishori Sinha, Prem Khandu Thungon, Narain Chand Parashar, Somnath Rath, Bipinpal Das, Sharad Dighe te an ni a. Khatihlaia Congress Mizoram MP (Lok Sabha) hming recorded ah a awm lo. Parliament a State of Mizoram Bill ni 5, August 1986 a sawiho leh vote lak a nih lai khan BJP MP pahnih chauhin 'No' tiin an vote a ni," an ti.

Chuvangin CM zahawmtak Lalduhoma hi Mizoram State Bill sawihona August 5, 1986-ah bill thlawp zawnga thusawi anga a insawi hi thukdiklo a ni a. Hetiang thu diklo hi ram hruaitu lûber hian sawi tawhlo turin MPCC chuan an chah a ni.