ZALEN March 30, 2026 : Mizoram Pradesh Congress Committee chuan vawiin khan Monday devotion leh Political Session an hmang a, MPCC Sr. Vice President Lalnunmawia Chuaungo chuan thu sawiin, "Congress-in sawrkarna kan chang leh anih chuan sawrkar kalphung kan thlak danglam ang a, keimahni hamthatnan thuneihna kan hmang ve dawn lo. Kan President hi mi dik a ni a, chutiang hamthatna um mi chu niin ka hre lo a ni,” a ti.

Lalnunmawia Chuaungo chuan, “Congress chuan Health care siamthat te hi kan ngaihpawimawh tur zinga mi a ni a, changtlung zawkin kan kalpui dawn a ni. Health Care hi ram hausa leh ram changkang te pawhin an buapui a ni a, a hautak em em a ni. Natna a nasat hma a inenkawlna, Primary Health hi tun thleng hian kan ngaihthah em em a, hei hi kan ngaipawimawh a ngai a ni. Natna a nasat hma a natna hmuhchhuah leh enkawlna hi Congres kan sawrkar chuan kan ngaipawimawh dawn a, natna hmuhchhuah zung zung a nih theih nan Primary Health Center te kan ti changtlung ang a, Laboratory changtlung tak kan din sak zel dawn a ni."

“Hei bakah hian Education reform hi kan kalpui dawn a, Primary Education kan ngaipawimawh dawn bawk. Higher Education kan ngaihthah dawn tihna a ni lova, a bul Primary Education ah tan kan la nasa dawn tihna a ni. Kan tu leh fate zirna bul hi kan ngaihthah thiang lova, a ler atanga thuai chi a ni lo. Hei bakah hian Power lam lamah pawh hmalakna tur tamtak a awm bawk a ni. MNF sawrkar kalta khan politic a hlawkpui nan Education hi an hmang a, tuna ZPM pawh hian chutiang tho chuan hlawkpui tumin hmanrua ah an hmang bawk a, keini chuan kan ti ve dawn lo."

"Sawrkar chuan development a buaipui tur a ni a, sumdawng a ni lova, sumdawnna kalpui nan hman tur a ni lo. Tuna kan Sawrkar hnathawh tamtak hi private sumdawng ten an khawih tur a ni a, chu chuan hna tamtak private sector ah a siamchhuak anga, sawrkar inrelbawlna a lo tlem anga, chu chu ram leh mipui ten an hlawkpui dawn a ni. Chutiang chuan kan sawrkar kalphung hi kan siamthat a ngai em em a, chu chu kan ngaipawimawh dawn bawk a ni."

“MNF khan kum 2018 kum tawpah thuneihna an chang a, an rorel dan kan hria a, mipui in an duhkhawp lo hle a nih kha. Chutah ZPM an lo lang a, thiam takin sawrkar kal tawh ten engmah an lo ti lo tiin sawrkar kal tawh te chhe lailet derah an chhuah a, thil tha tinreng an tiam a, research based in kan kal dawn an ti a, mahse a tlachawpin min kalpui a, min arkhawthim dai pui mek a ni. Chuvangin kum 2028 inthlan lo awm turah hian mipui in congress min beisei mek a, Congress nge nge kha an lo tha ber an ti tan mek a ni.

“Kan hma lawkah Aizawl Municipal Corporation inthlan kan hmachhawn dawn a, ZPM sawrkar hian a hunah min inthlanpui ngam lo a, AMC hi an thununna, thuneihna an kuta lak phawt a min inthlanpui hi an tum a ni. Tuna kawng an siam te hi mipui sum, mipui sum thehkhawm a ni. Sawrkar hmasa te pawhin kawng an lo siam ve thin ang tho khan an siam ve a ni mai a, mipui vote an hmuh belh vakin a rinawm loh,” a ti.