ZALEN June 17, 2026 : Mizoram Pradesh Congress Committee-a thuneitu sang PAC thukhawm chuan Rajya Sabha MP inthlanah MNF-in an party candidate Zothansangi Hmar vote pui tura an sawmna chu hnawlin, an party MLA chu vote thlak lovin hai (abstain) mai turin thutlukna an siam.

Congress Party chuan thuchhuah siamin Mizo National Front (MNF) party atangin an candidate vote pui tura sawmna kan dawn chu uluk taka ngaihtuah a ni a. MNF hi rorel lai ZPM party te ang thova kan ram, kan hnam, kan sakhua himna atana hlauhawm BJP nena puan inzarzawm te tho an ni a, Parliament-ah BJP te thlawp tur tho an nih avangin an candidate vote pui chu BJP te thlawpna tluk a nih avangin Congress party chuan kan vote pui thei lo a ni an ti.

Rajya Sabha MP inthlan hi naktuk June ni 18 hian neih tur a ni a, Congress party chuan an party MLA chu vote thlak lovin hai (abstain) mai turin thutlukna an siam tih an tarlang.

Tun dinhmunah rorel lai ZPM in MLA 27, MNF-in 10, BJP-in 2 leh Congress-in 1 an nei mek a, ZPM party official candidate chu K Laltluangkima niin, MNF party official candidate chu Zothansangi Hmar a ni.