Aizawl February 19, 2024 : February 17, 2024-a Chief Minister Lalduhoma leh NGO Coordination Committee hruaitute inkawm tuma Chief Minister Lalduhoma'n Myanmar nena ramri hung chungchang a sawinaah duhlohna lantira punkhawm leh lim inhalsak awm lo hram se, tha a tih thu a sawi chu Congress Party chuan pawi an ti a, dawihzep thlak an tih thu thuchhuah an siamah an tarlang.

Congress Party chuan, "Myanmar-a cheng Mizote nena kan in unauna tichhe thei tura Central Sawrkarin Myanmar nena kan ramri a hung lui a nih chuan Congress Party chuan na takin a dodal dawn a ni. Mizo mipuiten Myanmar nena kan ramri hung kan duh lo tih hre reng chunga Chief Minister Pu Lalduhoma’n ramri hung kan duh lohna lan chhuah tirna tur punkhawm leh lim hal lo tura NGO Coordination Committee te a ngen ta mai hi Mizoram-in Chief Minister dawihzep kan nei niah a ngai," an ti.

Congress Party chuan, "Congress Sawrkar laiin Manipur-ah Anti Tribal Bill avangin khatih laia CM Lal Thanhawla chuan Manipur-a Zofate tan nasa taka an thlavang hauhin Central Sorkar khak pawh a hlawh phah hial a ni. CM Lalduhoma’n Central BJP Sawrkar hlau a, ramri hung duh lohna punkhawm leh lim hal a hlau ta mai hi pawi a tiin Zofate tan Lalduhoma hi innghahna tlak a nih loh zia tarlangtuah kan ngai a ni," an ti bawk.