ZALEN January 27, 2026: MPCC President Lal Thanzara chuan vawiin khan Lal Thanhawla Auditorium-a Aizawl City Area's Block, Group, Unit Joint Meeting a hmanpui a, He huna thu a sawiinah Lal Thanzara chuan, "Kan CM hian Mumbai mi hausa fapa nupui neih lawma a kal thu tea intih lar tum tawh lovin, Kristiante thlavang hauh zawnga inti lar tawh turin kan ngen a ni," a ti.

Lal Thanzara chuan, "Nikum Krismas vuakvet tluka BJP leh a thurualpuiten Krismas lawmna an suasam nasat kha a la thleng ngai lo. Orissa state-a Pastor pakhat chu dawt phuahchawpin an hek a, tui hawk an intir a, bawngek an ei tir a. Heng rawngbawltute hmusittu hi Congress chuan nasa takin a dem a, Meghalaya CM pawhin a dem thu kan hmu. Kan CM, kohhran upa hian a dem thu a sawi chhuah thu kan la ngaithla lo hi a vanduaithlak hle. BJP mitmei veng chunga an awm chuan Kristian te thlavang hauh hi an ngam dawn lo a ni. Kan CM hlui Pu Hawla kha chu India ram Kristianten an thlamuanpui thin a, an tan a auchhuak fo a ni," a ti.

Congress Presideng chuan, "Tunah hian mipuite tan khawsak a harsa em em a, kan enchhin sawrkar hian inthlan laiin BJP sum an hmang a, an tlin tawh hnuin ngaihdan dang an neih san leh si a, tunah hian pawisa rawn pe tuten Mizoram tan pawisa an rawn release tha duh lo ta a. Hei hi mipuiin kan tuar mek a. Chuvangin, mipuite harsatna hriain kan sawrkar hian Pu Beichhua te hi dinhmun tha pe tawh se, central an au ei tawh mahna. Zoram mipuite hma khua ngaiin BJP nena an thawhhona hi ti nghet tak tak tawh turin ZPM sawrkar hi thurawn kan pe a ni,” a ti bawk.