Aizawl July 22, 2022 : MPCC Lalsawta chuan Congress party in Mizoram sum leh pai dinhmun chungchang tarlanna ‘White Paper’ an ngiat chhan a sawi a, Leibat hnem vangin mipui phur a rit chho mek zel niin kan hria a. Chuvangin, ram sum leh pai dinhmun dik tak hi mipuiin hria se an duh tih a sawi.

Congress Bhavan, Aizawl-ah Friday Political Session an neih naah MPCC President Lalsawta  chuan, "Health Care, Pensions, GP Fund leh sawrkar a Contract hnatawk ten rei tak chuang an hmuh tur ang an hmuh theih loh avang hian Mizoram sawrkar hian sum dinhmun hi mipui hriatah puang se kan tih vangin ‘White Paper’ kan ngiat a ni. Assembly Session zawhna chhanna atanga kan hriat danin MNF sawrkar hian RBI pawn atangin January, 2022 thleng khan cheng nuai hlir 3,26,465 (vbch 3264.65) leiba a puk belh tawh bawk a. Leibat hnem vangin mipui phur a rit chho mek zel niin kan hria a. Chuvangin, ram sum leh pai dinhmun dik tak hi mipuiin hria se kan duh a ni” a ti.

Lalsawta chuan, “MNF sawrkar tirh mai, kum 2019 atang khan sawrkar leiba hi cheng nuai tam takin a pung chho nghal a. Hmasawnna lian tham leh sum hmuh letna (Infrastructure Investment) hmuh tur awm si lovin, duhsak zawng te vur nan  sum an hmang chiam nia kan hriat vangin ‘White Paper’ hi tichhuak ngei se kan duh a ni. Central sawrkarin July ni 20-a Mizoram sawrkar chu Centrally Sponsored Scheme (CSS) sum zawng zawng anmahni Department Account-a dah lut vek tura a tih avanga sum harsa tura sawrkarin a sawi hi heng CSS sumte hi a hman lohna tur, Revenue Expenditure-ah an lo hmang tam tih a hriat theih a; kalphung pangngai a sum dah tur a nih tak avanga sum leh paia lama harsatna a zualkai tur chhan hi mipui hriata sawifiah tura kan duh vang a ni bawk” a ti.