ZALEN December 6, 2024 : Vawiin khan Golden Hall, Congress Bhawan-ah Congress party chuan Political Session kan hmang a, he hunah hian MPCC President Lal Thanzara chuan thu sawiin, “Mi duhawm tak takin kan party min rawn zawm thin. Mi thiam tak tak leh chhuanawm tak takin kan party min rawn bel chho mek a, heng te hi Pathian malsawmna a ni," a ti a, ZPM chu an intiamna ang ngeia sawhthing lei turin a ngen.

"He enchhin sawrkar, kan ti ang an ti ti lova, kan ti lovang an tih ti leh thin si te chanchin hi sawi a ngai leh thin. Anni chanchin sawi ngai leh thin hi a inthlahrunawm khawp mai a, amaherawhchu thusawi tur min supply tu ber an ni lawi si a. An pawnfen hi kan hlim san sak lutuk chuan, Zokhua a kuthnathawk tute hi kan ti beidawng lutuk ang tih pawh a hlauhawm bawk si. He ZPM sawrkar hi Congress party in kan duhsakna chu, an intiam ang hian kuthnathaktute thlai thar, an intiam ang ngei hian lei ngei se la, sawhthing te pawh hi lei ngei se, chumi hma chuan an sawrkar hi tla mai lo se, tih hi a ni," a ti.

Lal Thanzara chuan, "ZPM sawrkarin sawhthing an lei mekah pawh hian Congress Party chuan mit kan chhit kar a ngai dawn a ni. Anmahni party mi hlir society ah an indah a, Sawhthing Kg khat Rs. 50 in kan lei ang, an ti a, mahse Rs. 42 in an lei tih thawm te kan hria a. Heting thil hi Congress chuan kan en liam mai mai dawn lo a ni. Kan hotute inthurual taka ke pen mek hi, party mipuite hian thlawp tlat ila, mi tha tam takte luhna tlakah kan party hi siam turin ka sawm a che u," a ti.