ZALEN November 4, 2023 : Vawiin khan 2023 Mizoram Assembly Election Result puan a nih hnuah Congress party chuan Golden Hall, Congress Bhawan-ah inkhawm a buatsaih a. He hunah hian Lalsawta, President MPCC chuan thu sawiin ZPM chu sawrkar tha an siam ngei theihna turin duhsakna a hlan.

Lalsawta chuan, “Congress Party aiawha Lawngtlai West biala thlan Pu C. Ngunlianchunga kan lawmpuiin kan chhuang takzet. Mizoram mipuiin duh taka an thlan MNF leh ZPM MLA te ka lawmpui a, sawrkarna siam tur ZPM Party chu Mizoram tana sawrkar tha tak siam turin duhsakna ka hlan a, Mizoram mipui zawng zawngin a zar an zo theih tur sawrkar tha an siam ngei theihna turin duhsakna kan hlan a ni” a ti.

He hunah hian Congress Legislature Party Leader Zodintluanga Ralte pawhin thu sawiin, “Mizoram hmun hrang hrang atangin tawrhpuina kan dawng a, zam lo tur leh ram tana theihtawp chhuah zual sauh turin min ngen, tih sawiin, “Chutiang tur chuan rilru thar nen kan ram leh hnam tana Party mi zawng zawng nasa zawka thawk zel turin ka sawm che u a ni,” a ti . He hunah hian AICC aiawhin Sachin Rao, Mathew Antony leh C. Chawngkunga ten thu an sawi bawk.