Aizawl February 10, 2023: Vawiin khan Congress Party buatsaihin Lengpui Airport Chhanchhuah Hnatlang, Lengpui Airport-ah neih a ni a. He huna thusawitu MPCC Action Committe Chairman chuan Lengpui Airport ti hmel hema a awm chu an rilru a nat thu a sawi a. Mahila President Lalawmpuii Chawngthu chuan Tuirial Hydel Project leh Falkawn Referral Hospital-te anga MNF-ten Lengpui Airport an sawpchhiat leh mai hi an hlauh thu a sawi bawk.

He huna thu sawitu MPCC Action Committee Chairman H. Zairemthanga chuan, "Lengpui Airport hi cheng vaibelchhe 97.92 senga siam a ni a, December 1995 a sak tan a ni a, hetih lai hi Congress sawrkar lai niin, Pu Lal Thanhawla Chief Minister nih lai a ni. Kum hnih leh thla hnih chhung lek a sak zawh niin, Congress sawrkar lai vek kum 1998 February thla kan sak zawh a ni. Enchhin ngai neuh neuh a tam avangin Congress sawrkar laia hawn hman a ni ta lo a. MNF sawrkar thar a lo pian hnu lawk December 2, 1998-ah hawn a ni ta a ni. Chuvangin, Lengpui airport neitu nihna hi kan thinlungah a awm tlat a, tih hmel hema a awm hi kan duh lo a, kan rilru a na a ni," a ti. 

Lengpui Airport chhung leh a pawn cheithat hna chunchang sawiin H. Zairemthanga chuan, "A cheithat hna hi M/s Zoramchhana (CM Zoramthanga tupa) leh M/s KR Construction (Kamrula Chhangte) te hnenah dan lo a restricted tender hmanga a pek an ni a, a vaiin cheng vaibelchhe 116 man a ni. Work order pek an nih hmain hna an thawk tawh a ni. An hna thawh a tha lovin, Tui pawh pek pek mumal a ni lo a, nakinah chhiatna rapthlak zawk a thleng ang tih hlauhawm tak a ni. Lengpui Airport hian duat taka enkawltu sawrkar a mamawh. MNF sawrkarna hnuaiah hian neitu rilru pu lo a, sumtuakna atana an hmang mai mai hi kan rilru a na a ni," a ti.

ADCC President Lalrobiaka, Ex MLA pawhin thu sawiin, Lengpui Airport-ah dan leh thupek lal rawh se a ti a, "Vawiina Police duty te pawh hi sawrkar tha hnuaiah chuan India ram police tha ber in ni leh dawn a ni tih ka puang duh a ni. Mizoram mipuite tan kum 2023 kum tawpah hian Zalenna dar kan vaw dawn a ni," a ti bawk.

Mahila Hqrs President Lalawmpuii Chawngthu, Ex Minister chuan, "He airport hi Congress party sawrkar laia siam a ni, a chhiat kan phal lo. Buaina siam tura helai hmuna pungkhawm kan ni lo, Airport siamthat hna thawktuten zin veivakte hman tur awm lo khawpa Airport trolley an tichhiate hi kan duh lo. Contractor-te hian a tharin thlak leh vek rawh se. Mizorama Airport kan neih chhun Lengpui Airport-a hnamdang contractor Kamrula a hmang te hi kan duh lo. Tuirial Hydel Project leh Falkawn Referral Hospital-te anga MNF-ten Lengpui Airport an sawpchhiat leh mai hi kan hlau a, kan phal lo," a ti.

MPYCC President Dr. Lalmalsawma Nghaka  pawhin thu sawiin, "Mizoram sawrkar a GAD Aviation-ah hian sum chingpen tam tak a awm tih kan hria a. Lokayukta-ah FIR kan thehlut a, Lokayukta chuan CBI chhui tir nise a ti a, order a chhuah atangin kum 2 a liam tawh, MNF sawrkarin engmah a la ti lo. Helai Lengpui Airport chim chungchangah pawh MPYCC-in FIR kan thehlut a, mahse, MNF sawrkarin engmah a ti chuang lo. Airport siamthat hna thawktuten bungraw thiar nana trolley an hmang leh an tichhe vek hi a tha lo kan ti. Trolley hman tur awm loh vanga NE newspaper hrang hranga Mizoram kan mualphote hi a na kan ti," a ti.

Lengpui Airport a contractor ten trolley an tihchhiat chungchang hi National Students’ Union of India (NSUI) chuan zirchiangin, Congress sorkar laia Trolley 300-400 awm thin kha 25 chauh hmantlak a awmtih an hmuchhuakin January 23, 2023 khan thuchhuah an siam. Contractor ten Trolley an tihchhiatte chu ni 15 chhung ngei a a thara thlak vek turin an phut a. Amaherawhchu an hun tiam, February 7, 2023-a a ral pawhin thlak a ni lo a, thlak tumna a awm lo, an ti. MNF sawrkarin Contractor lakah action an la lo, an ti bawk.