Aizawl April 20, 2023 : Lunglei District Youth Congress Committe chuan Ni 19.4.2023 zinga District Jail Lunglei atanga mi 5 an tlan chhuah avangin Lunglei khawpui leh a chhehvel mipui te an ralti an ti a, kha thil thleng avang khan vawiin hian District Jail Lunglei chu a hmunah an tlawh a, thil thlen dan te an zirchiang a, sawrkar inthlahdah vangah an puh.

LDYCC chuan awlsam taka mi panga an tlanchhuah theihna chhan chu Mizoram sawrkarin District Jail Lunglei a hlamchhiah vang leh a tih tur a tih loh avanga thlenga an ngaih thu an sawi. 

District Jail Lunglei ah hian tang (inmates) awm thei zat(capacity) mi-100 anih laiin, mipa-134 leh Hmeichhia-16 an zavaiin mi-150 an awm mek. LDYCC chuan Tang an tlanchhuah theihna thin hi District Jail thawktu te inthlahdah vang nilo in, thawktu te indaih loh vang leh sawrkarin a tih tur a tih loh vangah an ngaih thu an sawi.

District Jail, Lunglei ah hian thawktu mi 23 awm turah tunah thawktu mi 13 an awm a, Medical duty tur an nei lo a, nurse hi pakhat nei mah se, Serchhip ah attach a ni. Pharmacist an neih thin chu kumin January khan a pension a, a aiawh tur hi dah a la ni lo a ni. District Jail Lunglei hian Ambulance pakhat a nei a, motor dang an nei lo a, driver an nei lo a,  emergency-a motor khalh tur pawn warden atangin an inpawt chawp mai thin niin Lunglei Congress thalai chuan an sawi.

Congress Thalai chuan District Jail Lunglei Building chu siam that leh thawm that mamawh vek an ti a, staff quater te pawh a tlakbal thu leh a thawk tuten tha leh zung sengin an thawm tha thin niin an sawi. Duty post pasarih (7) awm zingah Mizoram Home Guard Duty ten post thum (3) chiah an luah theih avangin duty indaih lohna te chu remchangah an la thin nia an hriat thu an sawi. "Duty awm lohna post zawnah hian tlanchhuah nan an hmang thin a ni. District Jail Lunglei-a Mizoram Home Guard Duty indaih lohna hi Mizoram sawrkar hian a rang thei ang berin dah belh vat turin kan phut a ni," an ti.