ZALEN September 2, 2026: Congress Thalai (MPYCC) chuan Mualthuam North tleirawl nunna laksaktu a puh Denghmingthanga, Police kuta a awm lai leh kutkawl a bun lai renga mipui mimir tan pawha him lo thei tura a tlan chhuak thei chu mak an tiin pawi an ti a. Tun hnai a Jail tang tlan chhuak an awm ta fo mai hi Home Minister chak loh leh inthlahdah vanga an ngaih thu thuchhuah an siamah an tarlang.

MPYCC chuan tu sawrkarah pawh Jail tang tlan chhuak hi an awm thin a, sawrkar dinhmun atangin za ah za inven chu a harsa ang tih a hriat theih a ni. Mahse, MNF leh ZPM Sawrkar kum reilote chhunga Jail tang tlanchhuak an tam ta lutuk leh an duh hun huna Jail tang te an tlanchhuak ta mai emaw tih tura a awm chu pawi an ti a. Kum 2022 atang August 2026 chhungin Mizoram jail hrang hrang aṭangin tang tlan chhuak mi 74 an awm a. ZPM sawrkar kum hnih leh a chanve chhung lek hian jail tang tlan chhuak an awm tam tawh hle. Jail tang tlan chhuak zingah pawngsual leh tualthat thubuaia tang (life convict), rukruk leh in rawk ching an nih fur avang hian ZPM sawrkar hian Mizoram mipui dinhmun himlo ah a dah mek a ni, an ti.

Mizoram Legislative Assembly Budget Session February ni 26, 2024 khan Home Minister K. Sapdanga chuan Mizoram Jail dinhmun chhiat dan leh siamthat a tul zia sawiin, Jail tangte chu zanah nula rima chhuak thinin zan rei tawh hnuah jail-ah an haw leh mai thin, niin a sawi a. Hei hian amah leh a department chan ngei mualpho takin a siam a, a department chan a hneh loh zia mipui hmaah a tarlang a. He mi hnu lamah pawh a khat tawka Jail tang tlanchhuak an awm tak fo avang hian Home department ah hmasawnna leh insiam that tumna a la awm chuang lo tih a lang chiang hle niin Congress Thalai chuan an ngai.

Chief Minister Lalduhoma'n ZPM PAC hmanga DP&AR Department K.Sapdanga a chhuhsak leh a hmaa DM&R dept a lo chhuhsak tawh te pawh kha Home Minister-in a department chan te a hneh loh em avang a, CM thahnem ngai lutuk ruhmanna a ni zawk em? tih chu Congress Thalai zawhna a ni.

ZPM sawrkar chuan Mizoram chhunga Jail hrang hrang te chu District Prison & Correctional Home tiin a hming a thlak a. Mipui bumna atana hming thlak ringawta term hmang zo lo tur leh a tak taka hnathawk turin Congress Thalai chuan ZPM sawrkar an hriattir bawk.